Nga Blendi Gashi
Diskursi politik në Kosovë ka kohë që rënë në nivel tejet të ulët, pasi qeveritarët dhe opozitarët, në mungesë të ideve dhe fakteve nuk kanë kursyer fjalorin banal për ta kundërshtuar njëri-tjetrin, sidomos gjatë vitit të fundit.
Një diskurs i tillë agresiv i njerëzve që udhëheqin vendin, dhe të zgjedhurve të popullit, është për brengosje, nuk ka të bëjë asgjë me kulturën politike, por janë pasqyrim i modelit më të keq që mund t’i ofrohet të rinjve dhe shoqërisë në përgjithësi.
Përdorimi i një fjalori të rëndë, ofendues dhe akuzues në rrafshin etik si “derr”, “gomar”, “ mbylle gojën”, “gënjeshtar”, “tradhëtarë”, etj., është bërë pothuajse një gjë e zakonshme dhe shumë normale, për politikanët tanë.
Opinionit i kujtohet ofendimi që i bëri kryeministri Mustafa deputetit dhe ish-liderit të Lëvizjes Vetëvendosje!, Albin Kurti, duke e quajtur gomar pas një komenti në të cilin Kurti kishte thënë se “Zajednicën e Serbisë” në Kosovë po e mundëson “Zajednica e vëllezërve të Thaçit me djemtë e Isës”.
Por, jo vetëm Mustafa ka përdorur një gjuhë të tillë. Pas tij, ka qenë edhe lideri i Aleancës për Ardhmërinë e Kosovës, Ramush Haradinaj, i cili në ndërtesën e Kuvendit të Kosovës e quajti “peder” kryetarin e Komisionit shtetëror për shënjimin e vijës kufitare me Malin e Zi, Murat Meha.
Të tilla debate ka pasur rast të dëgjohen shpeshherë gjatë seancave plenare të Kuvendit të Kosovës.
Diskursi agresiv gjuhësor dhe politik, sipas analistëve dhe sociologëve flet se sa poshtë ka rënë politika.
Ata thonë se diskursi i përdorur nga politikanët e vendit ndikon negativisht tek çdo i ri që synon të merret me politikë në të ardhmen.
“Komunikimi i vrazhdë politik, sinjal i keq për shoqërinë”
Sociologu, Besim Gollopeni, thotë se gjuha e përdorur në vitet e fundit nga një pjesë e politikanëve kosovar, në institucionet më të larta të vendit, dhe përmes tyre komunikimit me publikun, i ngjanë më shumë një skene “natyrore”, ku, secili ka rregullat e veta dhe secili ka të drejtën të flas çfarë të dëshiroj, të kundërshtoj pa argumente, pa përfillur rregullat unifikuese institucional dhe kështu duke mos u kujdesur për mesazhin që dërgohet tek komuniteti në përgjithësi.
Sipas tij, fjalori i përdorur nuk zënë vend në rregullat e komunikimit institucional, dhe si i tillë nuk i ngjason një komunikimi të një klase elitë shoqërore, por, thjeshtë, mbështet në fuqinë e klanit apo ideologjisë që i takon.
“Shprehjet e përdorura në institucionet më të larta të vendit si “mbylle gojën”, “ti nuk dinë gjë, rri aty”, “kriminel”, “hajna”, “të pafytyrë”, dhe të tjera shprehje të ngjashme si këto, si dhe ofendimet e shpeshta që kemi dëgjuar së përdoruri në mes të politikanëve në këto vitet e fundit, tejkalojnë rregullat institucionale dhe nuk i bëjnë nderë politikanit -ve dhe aq më pak nuk i bëjnë nderë institucionit të cilin përfaqësojnë ata. Një komunikim i kësaj natyre nga klasa politike në vend, jep një sinjal shumë të keq për shoqërinë në përgjithësi dhe në veçanti për të rinjtë që për profesion zgjedhin politiken. Pra, rrezikohet që në të ardhmen të instalohet një kulturë e tillë komunikimi në institucionet e vendit ku, fuqia e fjalës së thënë nuk mbështetet ne rregullat e vendosura institucionale por, mbështetet në fuqinë e fjalorit sa më të vrazhdë që përdor kundrejt tjetrit”, thotë sociolou Gollopeni, për tesheshi.com.
Sipas, tij kjo kulturë e komunikimit e përdorur nga politikanët e caktuar, tregon apo më mirë të thuhet ç’veshë politikanin nga artificialiteti dhe shpërfaq anën reale të personalitetit të tij/saj.
“Fjalori i politikanëve, infektim për të rinjtë”
Njohësi i rrethanave politike në vend, Leon Duhanaj, thotë se në një shoqëri të shëndoshë, të emancipuar, me vetëdije të lartë mbi vlerat e demokracisë dhe qytetërimit, mbi standardet dhe normat e mirësjelljes ku edukata qytetare është mirëfilli edhe një model i jetës së individit, nuk tolerohet gjuha vulgare, e pacipë, fyese e denigruese.
Ai thotë se janë të ashtuquajturat elitat të cilat domosdoshmërishtë shndërrohen në shembull për gjeneratat e reja, ku bëjnë pjesë figurat publike, qofshin ato nga politika, sporti, media, shoubizi apo edhe nga segment të tjerë të shoqërisë.
“Paraqitjet skandaloze të përfaqësuesve të zgjedhur të popullit, me një fjalor aq të ndyre, janë një devijim nga çdo normë e arsyeshme e sjelljes dhe, njëherësh janë infektim për gjeneratat e reja, duke u shndërruat si model skandaloz për to.
Në këtë kontekst, lirisht mund të thuhet se përpos që gjuha denigruese e padenjë dhe e ndyrë, s’i bën ndër shoqërisë në përgjithësi, nuk u bën mirë aq më shumë dhe, veçanërisht atyre të cilët një ditë synojnë të merren me artin e të bërit politikë”, pohon Duhanaj, për tesheshi.com.
Sipas tij fjala politikë ka pësuar një degradim shoqëror, dhe nuk kuptohet më si shkencë në vete, si një profesion fisnik i cili është në shërbim të vendit, si një art i së mundshmes, por si një mjet për ndikim dhe pasurim të shpejtë, si një mundësi për t’u integruar në organizata gjysmëkriminale siç në masë të madhe cilësohen partitë politike.
“Të gjitha këto janë shqetësuese dhe shumë të dëmshme për të ardhmen e këtij vendi, e në veçanti gjeneratave të reja të cilat po helmohen me këto dukuri të shëmtuara. Prandaj sa më parë, aq më mirë që të hiqet dorë nga këto metoda dhe të shndërrohet në një normë shoqërore që ata të cilët pretendojnë më qenë figura publike, atëherë t’u kërkohet edhe një kod, normë e mirësjelljes dhe një fjalorë dinjitoz”, shprehet Duhanaj, për tesheshi.com.
“Një diskurs i tillë nuk prodhon kulturë e progres, por armiqësi e shkatërrim”
Fjalori që përdoret në skenën politike e ka kritikuar ashpër edhe ish kryekuvendari Jakup Krasniqi, përmes një shkrimi autorial, ku ka thënë se zakonisht gjuha e rrugës hynë në institucione kur njerëzit humbasin arsyen, apo iu mungojnë argumentet.
Ai thotë se një diskurs i tillë nuk prodhon as kulturë e as progres, por, prodhon armiqësi e shkatërrim, prapambetje e mjerim!
“Në shikim të parë, kur njeriu dëgjon debatet në mes të pozitës dhe të opozitës shqiptare, e krijon përshtypjen se është duke dëgjuar përfaqësues të dy kombeve, të armiqësuar ndër dekada dhe që nuk synojnë ta gjejnë as edhe një fije interesi që i bashkon! Vërtet, një armiqësim i tillë, jo vetëm që nuk i duhet kombit brenda tij, një kombi që synon progresin, zhvillimin, mirëqenien kombëtare e shtetndërtimin për sigurinë kombëtare, por kjo gjuhë është shumë e dëmshme edhe po qe se përdoret edhe në mes kombeve fqinje, që edhe mund të kenë pasur mes tyre shekuj armiqësie”, ka deklaruar Krasniqi, duke thënë se duhet një gjeneratë e re politikanësh, që idealet e përmbysura të kombit t’i kthejë për së mbari!
/tesheshi.com/
