Zgjedhjet presidenciale në Francë po përcillen me interes të jashtëzakonshëm në Gjermani, atu ku pak muaj më vonë do të ketë zgjedhje po ashtu.
Politikanët gjermanë as që duan të dëgjojnë për mundësinë e një fitoreje të Marine Le Pen-it, të vënë hapur në krah kështu të centristit Emmanuel Macron.
Fitorja e tij në raundin e parë ka entuziazmuar shumë në Gjermani, siç lënë të kuptohet dhe reagimet e para pas daljes së rezultateve të votimit të së dielës.
Ministri i Jashtëm gjerman, Sigmar Gabriel, ka shprehur sigurinë se Macron do të jetë presidenti i ardhshëm i Francës.
“Jam i sigurt se Emmanuel Macron ka për të qenë presidenti i ardhshëm i Francës. Shkëlqyeshëm për Europën,” raportohet t’i ketë thënë Gabriel Deutsche Welle-s.
Një zëdhënës për politikën e jashtme i konservatorëve të kancelares Merkel në parlamentin gjerman, Juergen Hardt, ka deklaruar se, “Rezultatet e mira të Macron-it janë një sinjal inkurajues për të ardhmen e Europës. Tani është thelbësore që fuqitë proeuropiane të punojnë së bashku dhe të mbizotërojnë.”
Në favor të Macron-it është shprehur dhe Martin Schulz, kandidati socialdemokrat që pritet të vihet përballë Merkel-it në shtator në zgjedhjet në Gjermani.
Ai citohet të ketë thënë se shpresonte që Macron të fitonte me një shumicë të madhe në balotazh, për të mposhtur “kandidaten antieuropiane dhe haptas raciste Marine Le Pen”.
Një tjetër figurë e socialdemokratëve në parlamentin gjerman, Axel Schaefer, e ka parë rezultatin zgjedhor në Francë si një frenim të marshimit të së djathtës në Europë, duke sjellë në vëmendje zmbrapsjen e kandidatëve të tyre ekstremë në zgjedhjet në Austri dhe në Holandë.
Zgjedhjet presidenciale në Francë do të jenë natyrshëm në qendër të vëmendjes dhe në dy javët e ardhshme, pasi rezultati i tyre është jetik për të ardhmen e BE-së. Mund të thuhet pa frikë se ka aktualisht një front të zëshëm kundër Marine Le Pen-it, jo vetëm në Francë, por dhe jashtë kufijve të saj. /tesheshi.com/
