Nga Blendi Gashi
Organi Shqyrtues i Prokurimit (OSHP) apo “Gjykata” e tenderëve (milionave), që nga paslufta ka shërbyer në funksion të partive politike, konkretisht të atyre në pushtet, me qëllim përfitimi të miliona eurove.
Dështimi për të menaxhuar me këtë organ mjaft të ndjeshëm dhe mospjatimet mes partive në koalicion PDK-LDK, ka bërë që mazhoranca të propozon që “Gjykata” e tenderëve t’i jepet në menaxhim ndërkombëtarëve.
Ndërsa deputetë të pozitës pajtohen që një gjë e tillë mund të ndodh për një kohë të caktuar, opozitarët kundërshtojnë në mënyrë kategorike që agjencitë të kthehen në menaxhim të ndërkombëtarëve.
Ka qenë kyetari i Kuvendit të Kosovës, Kadri Veseli, i cili ka shpalosur idenë kompani ndërkombëtare ta marrin në menaxhim OSHP-në përkohësisht, deri në një fazë tjetër.
“Për bordin OShP ka thënë se është një ndër kritikat më të mëdha që i adresohen institucioneve dhe kemi diskutuar që për një kohë ky institucion të udhëhiqet nga kompani të huaja”, ka thënë Veseli, i cili ka pohuar se këtë ide e ka diskutuar edhe me kryeministrin Isa Mustafa dhe me partneret.
Mustafa: Ideja e kryekuvendarit veç për kohë ta caktuar
Deputeti i LDK-së, Muhamet Mustafa, duke komentuar propozimin e kryeparlamentarit Veseli thotë se OSHP mund t’i ipet në menaxhim ndërkombëtarëve por vetëm në një periudhë kalimtare por jo edhe për kohë të gjatë.
Deputeti Mustafa, njëherit njohës i ekonomisë në një prononcim për tesheshi.com thotë se duhet të fillojnë praktikat e transparences dhe llogaridhënies në të gjitha nivelet që nga Kuvendi i Kosovës, në Kuvendet Komunale dhe duhet të krijohet në shoqëri vetëdija e refuzimit të fortë të korrupsionit.
“Problemi qëndron se shoqëritë tona ende nuk e kanë ngritur vetëdijen se duhet refuzuar korrupsioni në të gjitha nivelet, sepse korrupsioni i ka dy anët edhe ata që marrin dhe ata që japing mito. OSHP mund të ketë në një periudhë të caktuar ekspert ndërkombëtarë por shoqëria duhet t’i ndërtojë kapacitetet e veta”, thotë deputeti Mustafa, për tesheshi.com.
Kadaj-Bujupi: Pushteti po dëshiron me prapakthy Kosovën
Derisa, deputetët nga pozita janë pro idesë së parlamentarit Veseli, deputetët e opozitës janë kundër një propozimi të tillë duke thënë se nuk duhet të merren vendime në dëm të shtetit por duhet të funksionojë ligji.
Deputetja e AAK-së, Donika Kadaj-Bujupi, në një prononcim për tesheshi.com thotë se pushteti ka mbrri në një shkallë kur po provon me improvizu dhe me prapakthy Kosovën në të kaluarën ku ka udhëheq Bashkësia ndërkombëtare.
“Nëse shkohet në këtë logjikë dhe modelit të propozuar duhet edhe të gjitha bordet e pavarura të kthehen në menaxhimin ndërkombëtarë për shkak se janë të kontrolluara nga kryekuvendari dhe bashkëpartiakët e tij dhe partnerët e koalicionit LDK dhe Lista Srpska. Ky dështim ka ardh në mungesë të aftësisë tyre por edhe të lakisë për të zaptuar shtetin përmes militantëve që i vunë në të gjitha organet e ndryshme të vendit, institucionet dhe bordet e pavarura”, ka thënë Kadaj-Bujupi, për tesheshi.com.
Analistët: Ideja e Veselit, hap përpara
Kurse, analistët në vend thonë se ideja e parlamentarit duhet të merret seriozisht. Analisti politik, Astrit Gashi thotë se propozimin e kryekuvendarit Veseli për t’i dhënë një kompanie të huaj drejtimin e OSHP-së nuk e quan as ide naive, as të keqe dhe as ndonjë risi, por një hap përpara.
Gashi përmes një postimi në Facebook ka shkruar se ka shtete nëpër botë që këtë gjë e bëjnë që një kohë të gjatë, madje edhe në procedurat fillestare të prokurimit, me qëllim që të sjellin një rregull dhe për të bërë ‘të padukshme’ dorën e pushtetit. “Outsourcing’ (Transferimi) i prokurimit mundëson njëkohësisht mbrojtjen e shtetit, por edhe të pushtetit. Faji e akuzat barten të kompania- dhe korrupsioni i shkallës së ulët e ai mesatar edhe ndalet. Ai nënkupton edhe pranimin nga pushteti që nuk mund ta ndal korrupsionin. Edhe kjo është një vlerë, kur nuk pranohet asgjë. Kadriut pak me vonesë i ka shkuar në mend ky llaf. Ma mirë vonë se kurrë meqenëse u bëm horë me prokurimet. Idenë e ka të huazuar- ama nga brenda!”, thotë analisti Gashi. (tesheshi.com)
