Nga Mensur Krasniqi
Tre ditë pas zgjedhjeve në Maqedoni vijon debati mbi formimin e qeverisë së re. Rezultatet nuk nxorrën fitues në kuptimin legjitim të fjalës, aq sa për të krijuar lehtësisht një qeveri të qëndrueshme.
Pra, është përafërsisht e njëjta situatë ku u ndodh dhe PD në Shqipëri në zgjedhjet e vitit 2009. Ajo fitoi ndaj PS-së, por me një diferencë aq të vogël sa nuk ja mundësonte një qeveri të qëndrueshme.
Dhe, deri sa u shfaq LSI e gatshme për të bërë koalicion, dominonte ideja për të shkuar sërish në zgjedhje. Dhe siç dihet ndodhi ajo që ndodhi, ku Ilir Meta, edhe pse ishte shfaqur shumë më i ashpër se Rama ndaj qeverisjes së demokratëve, me 5 mandate, ku disa prej tyre të marra dhe me votat e PS-së, shkoi dhe bëri aleancë me Berishën duke prodhuar një qeverisje ndër më të korruptuarat.
Në të njëjtin pozicion si Meta është sot Zijadin Sela, i vetmi që mund të bëhet patericë e dyshes Gruevski-Ahmeti par ta mbajtur ende në këmbë.
Ndërkohë, ata që i mëshojnë idesë për një qeveri teknike, për të shkuar më pas sërish në zgjedhje, kanë disa arsye që e mbrojnë këtë version.
Politikologu Abdylvehab Ejupi vlerëson se qeveria teknike është një mundësi reale, dhe kështu të zgjidhen shumë çështje jetike për vendin.
“Mandatet e fituara nga subjektet politike në zgjedhjet e së dieles përkthehet në atë që asnjë kombinatorike me koalicione nuk i jep shumicën për formim të një qëverie të qëndrueshme. Nga këtu është rast dhe mundësi shumë e mirë që partitë parlamentare të tubohen njëmendësisht dhe të formojnë qeverinë teknike, e cila në një periudhë të caktuar kohore, me praninë e ndërkombëtarëve, do të përpiqeshin për zgjidhjen e çështjeve të mëdha dhe strategjike shtetërore si zgjidhja e çështjes së emrit me të cilën do ta zhbllokonte procesin euro-integrues të Maqedonisë; regjistrimi i popullsisë, proces ky kyç për egzistencën e shtetit, veçanërisht në rrethanat e Maqedonisë ku çdo gjë dhe çdo proces është e lidhur me numra; rindarja e njësive zgjedhore, gjë që do ta reflektonte prezencën reale të shoqërisë, komuniteteve përkatëse në këtë shtet multietnik, që momentalisht është ekstremisht diskriminues, veçanërisht ndaj shqiptarëve; si dhe çështjet tjera jetike për Maqedoninë. Vetëm kështu, në perspektiv afatgjate Maqedonia do të çlirohej nga kthetrat e zhbllokimeve, nga asimetria në ndërtimin e saj që rëndë po lëngon dhe assesi të progreson, nga diskriminimi që shtetit jetën ia shkurton”, deklaroi për portalin tesheshi.com Abdylvehab Ejupi.
Pra, sipas Ejupit, vetëm me proces të dialogimit për çështjet kyçe për “shpëtimin e shtetit” mes gjitha subjekteve parlamentare, do të “shkundej” shteti për t’u ridefinuar dhe për t’u ribërë si shtet i barabartë për të gjitha komunitetet; vetëm kështu Maqedonia do të hynte në shinat brenda konceptit të njëmendësisë e të qenurit shtet./tesheshi.com/
