Politika kosovare, kryesisht ajo në pushtet, i është gëzuar miratimit të MSA-së, si të ishte ky fundi i problemeve për vendin; ndërkohë që pak javë më parë, mbeti me gisht në gojë kur Brukseli ia mbylli derën e vizave.
Ndërkohë që Kosova është zhytur prej muajsh n krizë më të thellë politike që pas luftës, e që po flitet dita-ditës për rikthimin e UNMIK-ut, atij që minon vetë Pavarësinë si jetësim për vendin, e në kohën pra që i mohohet hapur regjimi pa viza, politika e Prishtinës kapet pas një akti diplomatiko-burokratik, për t’i bërë fresk vetes, më saktë për të gënjyer veten, se gjërat po ecin për mbarë.
Dhe ja një pjesë e reagimeve:
Presidentja, Atifete Jahjaga:
“Marrëveshja për Stabilizim Asociim, e cila pas hyrjes në fuqi do të fillojë të zbatohet në praktikë, përbën hyrjen zyrtare të Kosovës në marrëdhënie kontraktuale me BE-në, dhe i vë vulën rrugës së pakthyeshme të Kosovës drejt BE-së. MSA-ja është një mundësi e shkëlqyeshme për fuqizimin e gjithanshëm të dialogut politik, të marrëdhënieve tregtare dhe të bashkëpunimit të shumanshëm ndërmjet Kosovës dhe BE-së.
Kryekuvendari Kadri Veseli:
“Një përkrahje e tillë e fuqishme, është shprehje e besimit evropian në kapacitetet e Kosovës për të përmbushur aspiratën e qytetarëve tanë, për të qenë pjesë e familjes së madhe evropiane”.
Ministri i Punëve të Jashtme, Hashim Thaçi:
“Ky është hapi i parë në rrugën e gjatë që do t’i sjell fëmijët tonë në gjirin e familjes evropiane. Luftuam për liri, fituam edhe pavarësinë dhe sot fillon edhe periudha e re evropiane e Republikës së Kosovës. Zoti e bekoftë Kosovën evropiane”.
Partia opozitare AAK (jo kaq veneruar sa pushteti):
“AAK vlerëson se miratimi i MSA-së jodomosdoshmërisht është garanci për rrugë të shpejt për anëtarësim në BE, sepse anëtarësimi në BE është drejtpërdrejt i ndërlidhur me nivelin e qeverisjes së brendshme dhe demokratizimin në tërësi”.
Raportuesja Ulrike Lunaçek (siç ja do puna):
“Për herë të parë, BE-ja dhe Kosova do të vendosin marrëdhënie kontraktuale, e që është një tjetër hap i rëndësishëm në rrugën e Kosovës drejt integrimit në BE. Një shumica votash në favor të kësaj marrëveshje jep një sinjal të rëndësishëm e pozitiv për qytetarët dhe ekonominë e Kosovës. Zbatimi i marrëveshjes do të ndihmojë institucionalizimin e procesit të reformave. Hapi i ardhshëm duhet të jetë liberalizimi i viza ve për qytetarët e Kosovës”. /tesheshi.com/
