Presidentja e Komisionit Evropian, Ursula von der Leyen, është kritikuar pasi gjatë vizitës së saj në Izrael, ajo nuk i bëri thirrje drejtpërdrejt atij vendi që të respektojë ligjin ndërkombëtar në luftën në Rripin e Gazës, shkruan Politico.
Von der Leyen, një politikane gjermane e qendrës së djathtë, të premten vizitoi venbanimin hebre Kfar Az, aty ku sulmoi Hamasi javën e kaluar.
Gjatë vizitës së saj, ajo shprehu mbështetjen e parezervë për Izraelin në emër të Bashkimit Evropian. Por tani është nën kritika nga ligjvënësit dhe diplomatët se nuk ka folur për pasojat humanitare të sulmeve hakmarrëse të Izraelit ndaj Hamasit në Gaza, të cilat vranë të paktën 2300 palestinezë.
“Ajo vetëm tha se Izraeli ka të drejtë të mbrohet, pikë. Kjo nuk është një linjë e rënë dakord nga vendet anëtare,” tha një diplomat, i cili foli për Politico në kushte anonimiteti.
Ministrat e Jashtëm evropianë dënuan sulmet e Hamasit, por gjithashtu bënë thirrje për mbrojtjen e civilëve dhe përmbajtje, lirimin e pengjeve dhe dhënien e aksesit në ushqim, ujë dhe ilaçe në Gaza, në përputhje me të drejtën ndërkombëtare humanitare.
Duke folur së bashku me kryeministrin izraelit Benjamin Netanyahu të premten, Von der Leyen tha se Izraeli kishte të drejtë të mbrohej. Pasi pranoi vuajtjet e palestinezëve të pafajshëm, ajo shtoi: “Unë e di se përgjigja izraelite do të na tregojë se është një demokraci.”
Von der Leyen vizitoi Izraelin me Presidenten e Parlamentit Evropian, Roberta Metsola, një kolege e saj.
Iratxe Garcia, kreu i grupit të socialistëve dhe demokratëve në Parlamentin Evropian, i tha Politico se si Von der Leyen ashtu edhe Metsola shprehën me të drejtë solidaritetin evropian dhe dënuan absolutisht sulmet nga Hamasi.
“Por si përfaqësuesit kryesorë të Bashkimit Evropian dhe institucioneve të tij, ata kishin detyrimin të përfaqësonin pozicionin e BE, duke përfshirë edhe shtetet anëtare të tij. Ata nuk e bënë këtë me vizitën e tyre në Izrael, duke treguar një paragjykim të papranueshëm”, shtoi spanjolli.
Bashkatdhetari i saj, ministri spanjoll për të drejtat sociale, Ione Bellara, akuzoi BE-në për mbështetjen e okupimit të Palestinës nga Izraeli dhe u bëri thirrje banorëve të dalin në rrugë për të protestuar kundër hipokrizisë së BE-së dhe krimeve të luftës të Izraelit kundër palestinezëve.
Bellara, një anëtare e krahut të majtë Unidas Podemos, partneri i pakicës së koalicionit të socialistëve nga i cili do të varet formimi i qeverisë së re, lëshoi një deklaratë duke bërë thirrje për një hetim kundër Izraelit në Gjykatën Penale Ndërkombëtare për kryerjen e krimeve të luftës.
“SHBA dhe BE janë bashkëpunëtorë në krimet e luftës të kryera nga Izraeli në territoret e pushtuara palestineze. Ne në Podemos nuk jemi indiferentë ndaj tmerreve që populli palestinez po përjeton për dekada. Izraeli po kryen një gjenocid të planifikuar në Gaza”, tha Bellara për konfliktin që vazhdon që nga viti 1948.
BE-ja e mbështet hapur Izraelin
Qeveria izraelite ka urdhëruar evakuimin e më shumë se një milion njerëzve nga Gaza veriore. Besohet se do të pasojë një pushtim tokësor i cili kritikohet edhe nga organizatat ndërkombëtare.
Përveç Komisionit Evropian dhe Parlamentit Evropian, institucione të tilla si Komiteti Evropian i Rajoneve dhe Qyteteve, të cilët shfaqën flamujt izraelitë në Bruksel, treguan mbështetjen e tyre për Izraelin. Atyre iu bashkua Këshilli i Evropës, i kryesuar në Strasburg nga ish-ministrja kroate e Punëve të Jashtme, Marija Pejçinoviç Buriç.
Pra, përkundër zërave kontesues, institucionet europiane janë rreshtur krah një vendi që nga ana tjetër avancon në territoret palestineze duke shkelur të gjitha rezolutat e OKB-së, si dhe duke vijuar të thellojë tragjedinë e një populli si ai palestinez. /tesheshi.com/
