Policia ka sekuestruar dy çanta me 16 kg lëndë narkotike e llojit kanabis sativa, por pa mundur të arrestojë posejduesit e saj.
Burime zyrtare bënë të ditur se gjatë patrullimit në kufirin e gjelbër në shtratin e lumit Drino, në drejtim të postës së vjetër Kakavijë, në vendin e quajtur “Shelgu”, u konstatuan 2 persona, të cilët transportonin dy çanta dore ku dyshohej se brenda tyre kishte lëndë narkotike.
Por sapo kanë vënë re afrimin e policisë, personat kanë lënë çantat dhe janë larguar, duke u ndihmuar edhe nga terreni i thyer dhe i pyllëzuar.
Burimet bëjnë të ditur se droga po transportohej drejt vendit fqinj, Greqisë.
Policia Kufitare në bashkëpunim me Sektorin për Hetimin e Narkotikëve po punojnë për identifikimin dhe kapjen e këtyre personave. /tesheshi.com/
