Pak javë më parë, kryeministri Edi Rama kërkoi nga policia të sekuestrojë asetet e krimit, duke e cilësuar këtë si një fazë të dytë në luftën kundër grupeve kriminale.
Dhe duket se porositë e Ramës po zbatohen në terren. Pas sekuestrimit të disa pasurive në vlerën e 670 mijë eurove në qarkun e Lezhës, policia ka sekuestruar edhe 150 milionë të tjera në Elbasan.
Burime zyrtare bëjnë të ditur se në bashkëpunim me Prokurorinë, në kuadër të një hetimi të ndjekur me metoda speciale të hetimit dhe në kuadër të intensifikimit të punës për zbatimin e Plan-Operacionit “Vjeshtë 2017”, u bë ndalimi i shtetasve: B.Koçiaj, 63 vjeç dhe A.Koçiaj, 33 vjeç , banues në Elbasan, ndërsa u shpallën në kërkim shtetasit I.K dhe O.D
Ndalimi i tyre u bë në zbatim të vendimit të datës 14.09.2017 të Gjykatës së Rrethit Gjyqësor Elbasan, e cila ka caktuar masën e sigurisë “Arrest me burg”, për veprën penale të “Pastrimit të produkteve të veprës penale ose veprimtarisë kriminale“, të kryer në bashkëpunim, më shumë se një herë dhe me pasoja të rënda”, parashikuar nga neni 287, pika 1, gërmat (a), (c), (d) dhe 2,3 të Kodit Penal.
Gjithashtu në Tiranë është sekuestruar apartamenti i një shtetasi të arrestuar në Spanjë, i dënuar si pjesë e një grupi kriminal që kryente grabitje. Banda shqiptare dyshohet se ka kryer me dhjetra grabitje, nga të cilat drejtësia spanjolle ka faktuar 35 të tilla. /tesheshi.com/
