Nga Blendi Gashi
Banorët e fshatrave të Deçanit të cilët sot në mëngjes u nisën për të shkuar te Kulla e Zhlepit, siç njoftuan përmes një kumtese, për të qëndruar tek stanet e tyre, nuk janë lejuar të shkojnë në atë pjesë nga policia e Malit të Zi.
Së bashku me banorët, rrugën e njëjtë e mori edhe deputetja e AAK-së, Time Kadrijaj, por që edhe ajo u kthye mbrapsht. Kjo e fundit ka konfirmuar për portalin tesheshi.com se forca të njësisë speciale malazeze nuk i lejuan banorët të shkojnë te stanet e tyre që i kanë te Kulla e Zhlepit, e që sipas marrëveshjes për Demarkacionin kjo pjesë i takon tashmë Malit të Zi.
“Ka qenë një iniciativë e banorëve të kësaj zone që të shkonin në kullotat e tyre por u ndaluan nga forcat e Malit të Zi edhe pse marrëveshja e Demarkacionit nuk është miratuar ende. Policia malazeze pas një komunikimi me qytetarët paralajmëroi ata të mos vazhdojnë rrugën më tej. Numri i forcave speciale malazeze u shtua dukshëm, dhe kështu për të mos u shkaktuar ndonjë incident eventual, qytetarët vendosën të mos vazhdojnë rrugën dhe të kthehen në shtëpitë e tyre, pra në Deçan.
Unë isha së bashku me 300 qytetarë që u nisën në mëngjes të shkonin në stanet e tyre te Kulla e Zhlepit. Pra, një autobus ishte i mbushur plot me qytetarët dhe 30 vetura tjera.
Qytetarët do të bëjnë përpjekje të shkojnë sërish të stanet e tyre.
Është për keqardhje që Mali i Zi po operon 5 km në territorin e Kosovës dhe banorët e Llukës e Deçanit nuk po munden të vizitojnë bjeshkët e tyre te kulla e Zhlebit”, ka thënë deputetja Kadridjaj, për tesheshi.com.
/tesheshi.com/
