Në Turbo, në veriperëndim të Kolumbisë, është kapur sasia më e drogës në vitet e fundit. Tetë tonë kokainë u gjetën të fshehura në një plantacion bananesh, që policia thotë se i përket bandës Clan Usuga.
Vlera e sasisë së kapur çmohet të jetë 240 milionë dollarë, ndërsa janë arrestuar tre të dyshuar, e tre të tjerë kanë mundur të largohen.
Presidenti kolumbian, Juan Manuel Santos, ka zgjedhur rrjetin social Twitter për të reaguar, ku ka shkruar, “Sasia më e madhe e drogës në histori; një goditje për kriminelët.”
Kurse ministri i Brendshëm kolumbian, Luis Carlos Villegas, ka sqaruar se 1.5 tonë e sasisë së kapur ka qenë e paketuar dhe e gatshme për t’u tregtuar.
Banda së cilës pretendohet t’i përkasë kjo sasi droge bëhet përgjegjëse dhe për një seri veprash të tjera kriminale, mes të cilave dhe për rrëmbime e vrasje. Policia kolumbiane thotë se ajo ka 2000 anëtarë aktivë, e se gjatë pesë viteve të shkuara janë kapur 6.700 pjesëtarë të saj. /tesheshi.com/
