Policia e Tiranës ka deklaruar se Emiliano Shullazi me dy anëtarë të grupit të tij janë arrestuar pas akuzave për gjoba ndaj disa biznesmenëve të ndryshëm.
Në një deklaratë të saj, Drejtoria e Policisë Tiranë ka dhënë detaje mbi ndalimin e Emiljano Shullazit dhe dy miqve të tij dhe për veprat penale për të cilat ata akuzohen.
Deklarata:
“Policia ekzekutoi urdhrin e ndalimit të Prokurorisë së Krimeve të Rënda Tiranë për ndalimin e tre shtetasve për veprën penale të “Shkatërrimit të pronës me eksploziv”, ndaj shtetasit A. Z, me qëllim kanosjen e tij për fitimin e pasurisë në mënyrë të padrejtë.
Rreth orës 01.30 pas mesnate është firmosur ndalimi i:
- Emiljano Shullazi, 38 vjeç, banues në Tiranë.
- Gilmando Dani, 38 vjeç, banues në Tiranë.
- Blerim Shullazi, 32 vjeç, banues në Krujë.
Ndalimi i këtyre shtetasve është bërë sepse në bashkëpunim me njëri-tjetrin dhe me persona të tjerë në kohë dhe qytete të ndryshme, kanë shtrënguar nëpërmjet kanosjes për dhënien e pasurisë në mënyrë të padrejtë biznesmen të ndryshëm.
Prokuroria për Krimet e Rënda Tiranë, për tre shtetasit e sipërpërmendur, ka rregjistruar një sërë procedimesh penale për veprat penale “Shtrëngimi me anë të kanosjes ose dhunës për dhënien e pasurisë”, “Shkatërrim i pronës me eksploziv”, “Prodhimi dhe mbajtja pa leje e amëve luftarake dhe e municionit” dhe “Grup i strukturuar kriminal”, parashikuar nga Nenet 109/b, 152, 278/4, 283/a dhe 333/a Kodit Penal”. /tesheshi.com/
