Policia franceze e antiterrorit ka kërkuar nga zyrtarët që e qeverisin qytetin e Nicës që t’i fshijnë të gjitha pamjet filmike të kamerave mbikëqyrëse mbi sulmin me kamion në Ditën e Bastijës, kur humbën jetën dhjetëra persona.
“Fshijini regjistrimet mes orës 22:30 të datës 14 korrik 2016 dhe 18:00 të datës 15 korrik 2016,” thotë dokumenti i policisë, kopjen e të cilit arriti ta siguronte Le Figaro.
Pikërisht këtij mjeti informativ francez i referohet Russia Today kur e bën të njohur lajmin në faqen e vet elektronike.
Policia franceze e antiterrorit e ka vënë gishtin në gjashtë kamera regjistrimet e të cilave duhen fshirë posaçërisht. Dokumenti shton se autoritetet duhet të fshijnë regjistrimet nga çdo kamerë që “ka kapur skenën e krimit”.
Sipas RT-së, një burim pranë autoriteteve të qytetit ka deklaruar se, “Kjo është hera e parë që na është kërkuar të shkatërrojmë dëshmi [nga sulmi].”
Duke iu referuar gjithnjë së njëjtës media, Zyra e Prokurorit në Paris e ka konfirmuar informacionin e dhënë nga Le Figaro, duke shpjeguar se kërkesa është bërë, “për të parandaluar shpërndarjen e pakontrolluar të imazheve [të sulmit]”.
Policia franceze e antiterrorit ka sqaruar megjithatë se ekspertët e saj kanë arritur ta marrin 100 për qind të informacionit nga kamerat e Nicës. /tesheshi.com/
