Një tjetër manifestim masiv i sindikatave kundër reformës së punës qe parashikuar të zhvillohej sot në kryeqytetin francez, por për të nuk është dhënë leja nga autoritetet e sigurisë në vend.
Pas protestave të mëhershme që kanë përfunduar në dhunë, policia franceze ka vendosur ta ndalojë manifestimin e planifikuar për këtë të enjte.
Në një njoftim një ditë më parë, autoritetet policore janë shprehur se nuk kanë patur zgjedhje tjetër veç ndalimit të manifestimit. Vetëm një javë më parë do të plagoseshin 40 persona dhe do të arrestoheshin dhjetëra të tjerë në protestën më të fundit të sindikalistëve.
Zhvillimi i Kampionatit Europian të futbollit në Francë gjatë kësaj kohe e pati detyruar dhe presidentin Hollande të kërcënonte me ndalimin e manifestimeve.
Reforma e re e punës, ndaj së cilës ka patur kundërshtime të ashpra, i ka nxjerrë prej muajsh në rrugë sindikalistët francezë. Veç skenave të dhunës, të pranishme në shumë prej manifestimeve, një numër shërbimesh në vend janë prekur nga grevat e herëpashershme, si, për shembull, në sektorin e transportit. /tesheshi.com/
