Policia e Shtetit ka zgjedhur që t’i përgjigjet me shifra akuzave të opozitës për rritjen e frikshme të parcelave të mbjella me kanabis në të gjithë territorin e vendit, duke mohuar njëherësh që eksponentë të saj të jenë implikuar në këtë aktivitet të paligjshëm. Z/Drejtori i Përgjithshëm i Policisë, Altin Qato tha se “deri më tani, në bazë të statistikave në vend janë asgjësuar më shumë se 1 milion e 200 mijë bimë kanabisi”. Për Qaton, kjo tregon një kontroll më të mirë mbi territorin.
“Kemi mundësitë që të bëjmë një kontroll më të mirë të territorit. Dikur, para 2 vitesh, duke patur zona të pakalueshme nga policia, ishte e vështirë sepse policia realisht, fokusohej aty më shumë, por edhe opinioni publik fokusohej tek këto zona të paprekshme. Këto nuk janë më zona ta paprekshme dhe perceptimi publik është që ka shtrirje. Nuk është se ka shtrirje, thjesht kontrolli ynë është më i plotë se më parë”, shtoi më tej nr.2 i Policisë së Shtetit.
Gjithashtu, Qato ka mohuar ekzistencën e ndonjë raporti të partnerëve ndërkombëtarë mbi kultivimin e drogës në vend.
“Në mënyrë kategorike nuk ka. Ne jemi shumë të hapur me partnerët. Kemi bërë shumë takime, kemi shkëmbyer mendime, informacion. Kemi kërkuar informacion dhe nuk kemi patur asnjë situatë të tillë që të implikohen punonjës policie“, tha ai.
Megjithatë, kudo në opinion është formësuar bindja e thellë se nën qeverinë “Rama”, kultivimi i kanabisit ka marrë një hov të paparë duke pushtuar territore të tëra në të gjithë vendin. Dhe kjo, për paradoks, që pas goditjes së Lazaratit.
Për cinikët, e jo vetëm, tashmë Lazaratin e gjen në të gjithë Shqipërinë. /tesheshi.com/
