Policia e Kosovës, referuar situatës së krijuar dhe humbjes së jetëve të njerëzve në aksidente, ka marrë masa shtesë me krijimin e “Task Force”, përmes së cilës është bërë shtimi i prezencës së njësiteve policore në të gjitha akset rrugore, duke aplikuar tolerancë zero, ndaj gjithë kundërvajtësve në trafik.
“Vlen të theksohet se aplikimi i tolerancës zero ndaj gjithë kundërvajtësve, ka shtuar edhe numrin e e gjobave ku gjatë 24 orëve të fundit janë vendosur 2218 të tilla, duke përfshirë edhe për tejkalimin e shpejtësisë që është njëri prej shkaktarëve kryesorë në aksidentet me pasoja fatale”, thuhet në njoftimin e policisë.
Kjo “Task Force” policore do të vazhdojë me angazhimin e saj në terren deri në arritjen e qëllimit dhe objektivave, që janë përmirësimi i sigurisë në trafik dhe parandalimi i aksidenteve.
Policia vazhdon të apelojë tek të gjithë drejtuesit e mjeteve, që të respektojnë shenjat rrugore, t’u përshtaten kushteve të rrugës dhe shpejtësisë së lejuar, në mënyrë që të gjithë së bashku të kontribuojmë për një siguri më të madhe në trafik. /tesheshi.com/
