Banorët e Kosovës të nacionaliteti serb të cilët kanë marrë letërnjoftime të lëshuara nga strukturat paralele serbe në Kosovë, nuk mund të hyjnë e as të dalin nga territori i Kosovës. Këtë vendim e ka lëshuar të martën gjatë natës policia e Kosovës, duke urdhëruar policinë kufitare, sidomos atë në Jarinje dhe Bërnjak që ky urdhër të zbatohet.
Por deri më tani, teksa po raportohet ky lajm, ky urdhër për dy pikat kufitare në veri të Kosovës nuk është duke u zbatuar – kanë njoftuar burime të portalit tesheshi.com.
Policia, në dy pikat kufitare në veri të Kosovës, tani për tani vetëm po i paralajmëron qytetarët serbë të Kosovës që urgjentisht duhet të pajisen me letërnjoftime të shtetit të Kosovës se përndryshe nuk munden të hyjnë e as të dalin nga Kosova.
Këtë, për portalin tesheshi.com e kanë konfirmuar edhe disa qytetarë serbë të Kosovës që janë kthyer sot nga Serbia në Kosovë e që kanë pas vetëm letërnjoftime të Serbisë të lëshuar nga strukturat paralele serbe në Kosovë.
“Më është afruar një polic i Kosovës dhe më tha se me këtë letërnjoftim që e ke të Mitrovicës e që e ka lëshuar Ministria e Punëve të Brendshëm e Serbisë në qytetin e Rashkës, më nuk vlen. Pra duhet të merrni letërnjoftimin e Kosovës, ose atë letrën me të cilën dëshmon se ke aplikuar për letërnjoftim”, ka thënë qytetari serb që nuk ka dashur të identifikohet.
“’Tani mundesh me kalu pasi që po të njoh, por herën tjetër do të kthej nga kufiri’, më tha polici serb që punon në policinë e Kosovës në pikën kufitare në Jarinje”, shtoi qytetari serb.
Shumë banorë, përgjithësisht të nacionalitetit serb, e që janë qytetarë të Kosovës, nuk kanë asnjë dokument të marrë nga institucionet e shtetit të Kosovës, pasi deri më tani kanë shfrytëzuar dokumentet e Serbisë të lëshuar nga strukturat paralele në Kosovë.
“Në Mitrovicë, Leposaviq, Zveçan dhe Zubin Potok, besohet se ka mbi 15 mijë qytetarë serbë që nuk kanë dokumente të Kosovës, pra nuk kanë letërnjoftime”, ka thënë një zyrtar serb nga veriu i Mitrovicës.
Por ky “tregim muskujsh” nga ana e policisë së Kosovës në një zonë ku ligjin e bën Beogradi, nuk besohet të kalojë kaq lehtë. Ka gjasa për një rikthim të barrikadave, e natyrisht trazirave në veriun i cili dhe kur është i qetë, i trazuar është sërish.
Për momentin, përfaqësuesit politik serbë të veriut të Kosovës nuk kanë reaguar, por dyshohet se në rastin më të parë kur policia të kthejë ndonjë qytetar nga dy pikat kufitare Jarinje dhe Bërnjak, ato do të urdhërojnë bllokimin e këtyre dy pikave kufitare duke mos lejuar as hyrjen dhe daljen e mallrave.
Një burim i afërt me strukturat serbe i tha portalit tesheshi.com se katër kryetarët e komunave të veriut të Kosovës, kanë marrë urdhër nga qeveria e Beogradit për vendosje të barrikadave në dy pikave kufitare, kur të nisë bllokimi shtetasve të nacionalitetit serb për arsye dokumentash.
Serbët në veri theksojnë se arsye kryesore se pse deri më tani nuk janë pajisur me letërnjoftime të Kosovës, është se nuk u janë dashur për asgjë.
“Dhe derisa mos na detyrojnë, ne nuk do t’i marrim dokumentet e Kosovës”, ka thënë një qytetar serb nga Mitrovica.
Në anën tjetër, në zyrat e Ministrisë së Punëve të Brendshme të Kosovës në veri të cilat lëshojnë letërnjoftime, kanë theksuar se këto institucione janë të gatshme që para vitit të ri të presin shumë aplikime të qytetarëve për të marrë letërnjoftimet.
“Për këtë fluks që besohet se do të jetë i madh ne jemi të gatshëm, pasi që proceduat janë të lehta, e sidomos për ata që së paku kanë pasur një dokument të lëshuar nga UNMIK-u. Tani është edhe më lehtë, se përveç dokumenteve të UNMIK-ut, zyrat e gjendjes civile i kanë edhe librat amëz që janë kthyer nga Serbia”, ka thënë zyrtari i Institucioneve të Kosovës në veri të Mitrovicës.
“Për disa ditë, çdo njeri që aplikon do të pajiset me letërnjoftim të lëshuar nga shteti i Kosovës”, ka shtuar zyrtari.
Por sipas tij, problem në këtë rast do të jetë vetëm për vajzat serbe që janë martuar në Kosovë, ndërkohë që letërnjoftimi është lëshuar në qytetin e Kralevës e vendbanimi i shkruan Mitrovicë. “Por edhe për këtë do të gjendet një zgjidhje”, ka thënë zyrtari. /tesheshi.com/
