Pandemia e virusit korona dhe izolimi social po kontribuojnë në një “situatë të tmerrshme” që i bën të rinjtë më të ekspozuar ndaj radikalizimit, paralajmëroi policia britanike.
Niveli i kërcënimit nga terrorizmi në vend u ngrit në “serioz” në fillim të këtij muaji, një masë paraprake pas sulmeve në Francë dhe Austri. Ndryshimi do të thotë që një sulm ka të ngjarë të ndodhë.
Deri në fund të qershorit, për një periudhë prej 18 muajsh, 17 fëmijë ishin arrestuar nën dyshimin e veprave terroriste, duke përfshirë disa të moshës 14 vjeç, tha policia e antiterrorizmit.
Një situatë që nuk mund të parashikohet
“Ka pasur një rritje të ndjeshme të numrit të materialeve ekstremiste në internet në vitet e fundit dhe për shkak të COVID-19 njerëzit me rrezik kalojnë më shumë kohë të izoluar dhe në internet, me më pak faktorë mbrojtës të siguruar nga shkolla, punësimi, miqtë dhe familja,” tha Neil Basu, shefi kombëtar kundër terrorizmit i policisë britanike.
“Sipas mendimit tim, është një situatë e tmerrshme, një gjendje që nuk mund ta parashikojmë dhe nga e cila mund të ndiejmë efektet e shumë viteve që do të vijnë.” /tesheshi.com/
