Ambasadori grek në Brazil, Kyriakos Amiridis, qe zhdukur prej së hënës, për t’u gjetur të enjten i shkrumbuar në një makinë të djegur në periferitë e Rio de Zhanejros.
Ngjarjet kanë marrë një kthesë të papritur, pasi policia braziliane deklaron se ambasadori u vra nga një punonjës policie që kishte lidhje intime me gruan e tij.
Francoise Amiridis, gruaja braziliane e ambasadorit, e ka organizuar vrasjen me të dashurin e saj, thotë policia vendase. Ajo bashkë me të, si dhe një kushëri të tij, janë ndaluar nga policia, janë marrë në pyetje, dhe do të mbahen në paraburgim për 30 ditë.
Sipas policisë, i dashuri i gruas së ambasadorit ka pranuar që ta ketë mbytur atë.
Autoritetet përkatëse braziliane po e trajtojnë vrasjen si një krim pasioni, ndërsa hetuesi i çështjes, Evaristo Pontes Magalhaes, e ka cilësuar atë një akt tragjik, burracak.
Ambasadori 59-vjeçar jetonte prej 15 vitesh me të shoqen, një bashkëjetesë prej së cilës kishin një vajzë dhjetë vjeç. Ai kishte udhëtuar për në Nova Iguacu, një qytet në veri të Rios, për t’i kaluar Krishtlindjet dhe Vitin e Ri me të shoqen dhe prindërit e saj. /tesheshi.com/
