Xhamia në fshatin Rakosh, i cili gjendet në Komunën e Istogut, është bastisur gjatë ditës nga Policia e Kosovës nën dyshimin se në këtë objekt fetar ka të fshehura armë dhe mjete eksplozive.
Ka mjaftuar një telefonatë anonime gjoja se në xhami ka armë dhe mocion eksploziv, që të bëhet kjo bastisje në xhami. Por pas bastisjes është vërtetuar se në këtë xhami nuk ka asnjë armë apo municion siç është pretenduar. Këtë e konfirmon për tesheshi.com edhe imami i kësaj xhamie Abedin Haxhiaj. Ai ka thënë se kontrollimi ka zgjatur rreth dyzet minuta dhe se policia nuk ka gjetur asgjë për çka pretenduar.
“Sot diku rreth orës 11:30 jam thirrur nga policia. Pastaj rreth orës 12:25 ka ardhur ekipi për deminim. E kanë kontrolluar Xhaminë dhe objektin përcjellës për rreth 40 minuta dhe nuk kanë gjetur asgjë. Sjellja e tyre ishte korrekte”, ka thënë imami Haxhiaj.
Ai tregon se policia i ka thënë se kanë marrë informacione për vendosje të mjeteve eksplozive dhe se bastisja po bëhet për këtë qellim, e jo për ndonjë qellim tjetër.
“Më thanë se kemi pas një telefonatë anonime për një mjet plasës në Xhamin e Rakoshit. Ata nuk më kanë thenë për municion, por gjoja se ka mjet shpërthyes. Për këtë arsye erdhën edhe njësia përkatëse, zjarrfikësit dhe ambulanca”, u shpreh Haxhiaj.
Por se ka qenë bastisje e qëllimshme për të kërkuar armë e konfirmon zëdhënësi i Policisë së Kosovës për rajonin e Pejës rreshter Xhevat Ibraj.
Ai ka thënë për “Zërin” se policia ka marrë një informatë bazuar në informacionin që është njoftuar prokurori i shtetit se në xhamin e fshatit Rakosh ka armë dhe municion tjetër të dyshimtë.
“Është njoftuar prokurori i shtetit, me vendimin e tij është zhvilluar një operacion bastisje nga Stacioni policor në Istog që ka kryer bastisjen”, ka thënë Ibraj.
Edhe Policia e Kosovës ka konfirmuar se në këtë xhami nuk është hasur në armë dhe municion pas bastisjes së kryer.
