Efektivat e policisë në terren do të jenë të pajisur me kamera trupi në uniformat e tyre, çka, sipas Kryeministrit Edi Rama, i bën të monitorueshëm në çdo sekondë të orarit të tyre të kryerjes së detyrës në çdo aspekt, nga vendndodhja, reagimi, komunikimi me qytetarët apo çdo sjellje dhe reagimi që bie ndesh me ligjin
Deklarata e Kryeministrit erdhi sot gjatë prezantimit të projektit për kamerat e trupit të Policisë së Shtetit, duke shtuar se kamerat e trupit do të shërbejnë për një betejë më cilësore ndaj krimit të organizuar, korrupsionit apo shkeljes së ligjit.
Për Kryeministrin, programi i revolucionit teknologjik në Policinë e Shtetit është një mënyrë për të realizuar një transparencë të plotë te forcat e rendit, e cila u jep mundësi drejtuesve, punonjësve dhe qytetarëve që të lexojnë çdo akses të kësaj veprimtarie dhe ballafaqon Policinë e Shtetit me mundësinë për të pasur një polici që nuk ka dallim me policitë e Bashkimit Europian.
Ai tha se në këtë mënyrë nuk ka mundësi efektivi që ta fikë kameran dhe të mbyllë sytë dhe të bëhet bashkëpunëtor i veprimtarisë korruptive. /tesheshi.com/
