Nga Blendi Gashi
Në Shqipëri ka nisur prej ditësh së praktikuari vendosja e kamerave në trupin e policëve, gjë e cila ka dhënë dukshëm efekt, si për ata vetë e si për qytetarët, duke i detyruar të zbatojnë ligjin dhe vetëm ligjin, pa qenë e mundur të rrëshqasin në gjeste korruptive të ndërsjellta duke tentuar të rregullohen me ryshfete, një palë për ta dhënë e tjetra për ta marrë.
Para se të vinte në pushtet, Rama pat deklaruar se do e shndërronte policinë rrugore të Shqipërisë së paku si ajo e Kosovës, në drejtim të seriozitetit në zbatimin e ligjit.
Ndërsa tani çështja shtrohet nëse mundet që policia rrugore e Kosovës të arrijë të aplikojë dhe ajo këtë risi të homologes së saj në Shqipëri, për t’u bërë akoma më serioze, akoma më e përgjegjshme në zbatimin e ligjit dhe moskorruptimin me anë të ryshfeteve
Policia e Kosovës, e kontaktuar nga portali mbarëkombëtarë tesheshi.com thotë se janë në fazën e vlerësimeve nëse do të ndjekin modelin e policisë shqiptare, për çka do të realizojnë edhe disa vizita në Tiranë.
Kurse ekspertë të sigurisë, thonë se vendosja e kamerave në trupat e zyrtarëve policorë, i ka dy anë: pozitive dhe negative.
Policia e Kosovës në fazën e vlerësimeve
Zëdhënësi i Policisë së Kosovës, Baki Kelani, thotë se Policia e Kosovës ka zyrtarë profesionistë të profileve të ndryshme që tregojnë rezultate të larta në parandalimin e krimit dhe korrupsionit.
Kelani thotë se profesionalizimin e policisë padyshim po e ndihmon bashkëpunimi i ndërsjelltë me qytetarë por edhe metodat e ndryshme të teknologjisë, duke përfshirë edhe kamerat.
Ai pohon se edhe teknologjia, apo metodat e përdoruara përmes teknologjisë, ndihmojnë punën e Policisë se Kosovës në parandalimin dhe zbulimin e krimit në fusha të ndryshme, duke përfshirë edhe atë të kibernetikës.
“Policia e Kosovës është në fazën e vlerësimeve të vendosjes së kamerave tek zyrtarët policor, ku lidhur me këtë pritet të realizohen edhe vizita në Shqipëri dhe varësisht prej vlerësimeve dhe planifikimeve do të ndërmerren veprimet e mëtutjeshme.
Policia e Kosovës në operacione të veçanta, në operacione të planifikuara përdor kamera, të llojeve të ndryshme, duke përfshirë ato që ju vendosen zyrtarëve policor, për tëxhiruar të gjitha veprimet që ndërlidhen me operacionet policore, ku të njëjtat në bazë të vlerësimeve edhe bëhen publike”, ka thënë Kelani për tesheshi.com.
Vendosja e kamerave, me efekte pozitive dhe negative
Eksperti i sigurisë, Drizan Shala, thotë se vendosja e kamerave në trup të pjesëtarëve të policisë ka dy efekte pozitive profesionale dhe një negative në aspektin human-privat.
“Vendosja e kamerave në trupin (krahun e policit) i ka këto dy anë pozitive:
Efekti i parë pozitiv: Gjatë patrullimit nëpër rrugët dhe në orarin e punës syri i kamerës sheh edhe disa gjëra që ndoshta vëmendja e oficerit nuk i sheh dhe pas çdo analize të ditës së punës mund të evidetohen edhe disa vepra tjera penale.
Efekti i dytë pozitiv: Do të ngrihet efikastiteti i uniformës blu.
Efekti negativ: Në aspektin human-privat është që çdo polic do të jetë jo polic, por do duhet të mbetet artificial përgjatë orarit të shërbimit dhe do të humbet ajo afërsia me qytetarin të cilën edhe e ka Policia në moton e saj “Policia është Popull, Populli është polici”, ka thënë eksperti Shala, për tesheshi.com.
Policia shqiptare është e para në Ballkan që aplikon vendosjen e kamerave në trupin e punonjësve.
/tesheshi.com/
