Nga redaksia
Ratomir Bozhoviç është i dyshuar si vrasës i policit Enver Zimberi. Për të ka një fletarrest nga Policia e Kosovës dhe EULEX-i, por kjo nuk ka mjaftuar që ai të bjerë në pranga dhe të shkojë para drejtësisë. Dhe jo vetëm kaq. Thuhet se ai bredh lirshëm në veri, duke qenë se hera-herës duket dhe nga Zubin Potoku, për të parë nga afër familjen, pasi thonë se jeton në periferi të Beogradit.
Dhe ajo çfarë nuk është thënë, e që po njoftohet nga burimet të faqes tesheshi.com, është se tre policë të Kosovës, dy nga stacioni në Zubin Potok dhe një nga komanda rajonale e policisë në veri të Kosovës, kanë marrë me qira hotelin “Aleksandria” të Ratomir Bozhoviçit, që ndodhet në Zubin Potok.
Policia e Kosovës e ka mohuar një gjë të tillë. Numri dy i saj për rajonin Veri, Besim Hoti, tha “se nuk qëndron fakti se policë të Kosovës kanë marrë me qira lokalin e Ratomir Bozhoviçit. Për të ka të lëshuar një fletarrest ndërkombëtar, dhe policia është e përkushtuar në kapjen dhe sjelljen e tij para drejtësisë.” Por, nga ana tjetër, ajo nuk e mohon që ka informacione se efektivi me inicialet I.B. ka qenë në bisedime për marrjen me qira të hotelit, pronë e të kërkuarit Bozhoviç. 
Ndërsa një burim konfidencial i tha faqes tesheshi.com se hoteli “Aleksandria” në Zubin Potok realisht është marrë muaj më parë me qira nga ana e tre policëve të Kosovës me inicialet I.B., Z.M. dhe M.L.
“Hoteli tani është kthyer në vendin ku mblidhen krerët e krimit të organizuar dhe të kontrabandistëve në veriun e Kosovës, e që drekojnë e darkojnë së bashku me disa pjesëtarë të policisë së Kosovës,” ka thënë burimi.
Dhe e dhëna tjetër është se tre policët e Kosovës, pra, qiramarrësit e hotelit, kanë dhe një lokal në qendër të Zubin Potokut, ky tregtojnë në mënyrë ilegale municion për pushkë gjuetie, si dhe cigare pa pullë fiskale.
Në anën tjetër, Miodrag Lekiç, zyrtar i policisë së Kosovës në Veri, emri i të cilët është përmendur nga burimi i portalit tesheshi.com se është një nga qiramarrësit e hotelit të Ratomir Bozhoviçit, ka theksuar përmes telefonit se, “nuk është e vërtetë që unë jam i implikuar në këtë çështje,” dhe ka shtuar se, “kam disa informacione se polici tjetër, I.B., që është me afërsi familjare me policin Z.M., ka pasur diskutime që ta marrë atë hotel me qira, por se deri ku ka shkuar kjo punë unë nuk e di”.
Ratomir Bozhoviç, biznesmen nga Zubin Potoku, dyshohet se më 26 korrik të vitit 2011 ka vrarë në vendin e quajtur Varaga, në rrugën Mitrovicë – Zubin Potok, policin e njësisë speciale të Kosovës, ROSU, Enver Zymberin, i cili në atë moment gjendej në krye të detyrës për marrjen nën kontroll të pikëkalimit kufitar G 31 në Bërnjak. /tesheshi.com/
