Pesë dëshmitarë të drejtësisë italiane ishin personat kyç që zbërthyen skemën e trafikimit të 6 tonëve kanabis përmes Adriatikut në disa episode të ndryshme, raporton Euronews Albania.
Pjesë e dosjes janë edhe dy ish-zyrtarët e policisë, Ilirjan Balla, ish-zëvendës drejtori i Policisë së Vlorës, si dhe ish-oficeri i Kavajës Artur Krasniqi, të akuzuar për shpërdorim detyre.
Bashkë me ta nën akuzë është edhe prokurori i pezulluar Maksim Sota, të cilin pak ditë më parë Gjykata e Lartë nuk pranoi ta lironte nga arresti shtëpiak.
Gjatë viteve të fundit rreth 20 policë janë skeduar për lidhje me narkotrafikun.
Në vitin 2015, shefi i Burimeve Njerëzore po në Policinë e Vlorës u akuzua se ndihmonte një grup trafikantësh që transportonin kanabis me aeroplan nga Vlora në Brindizi.
Ish-nën/komisari i Fierit, Festim Lelaj pak javë më parë u dënua me 17 vite burg për trafikimin e një sasie prej 2.5 ton hashash nga Porti i Durrësit.
Operacioni “Shpirti” ka vënë nën akuzë për trafik droge edhe dy truprojat e ish-ministrit të Brendshëm Sajmir Tahiri, ish-gardistët Agustin Deda e Hekuran Marku.
Një muaj më parë për trafik droge në bashkëpunim me grupin “Habilaj” u dënua me 8 vite burg edhe ish-shefi kundër krimit të organizuar në Vlorë Gjergj Kohilla.
Si pjesë e kësaj dosjeje në kërkim vijon të jetë edhe ish-shefi i stacionit policor Dhërmi, Sokol Bode.
Sipas raporteve ndërkombëtare, Shqipëria mbetet një nga furnizuesit kryesorë me kanabis ndërsa Departamenti Amerikan i Shtetit i ka cilësuar të brishta institucionet ligjzbatuese.
“Zyrtarë, politikanë, gjyqtarë dhe personat me interesa të fuqishme biznesi shpesh ishin në gjendje t’i shmangeshin ndjekjes penale”, thotë raporti i DASH, raporton kështu Euronews Albania. /tesheshi.com/
