Prokuroria e Kukësit ka lëshuar 22 masa sigurie për punonjës të Policisë së Shtetit, për shkak se kishin vendosur gjoba të paarkëtuara me vlerë dy milionë e 123 mijë lekësh. Pra, para që i kanë future në xhepin e tyre.
Duke keqpërdorur aksesin në sistemet dhe databazat e Policisë së Shtetit, policët në terren konstatonin shkeljen, administronin shumën monetare duke i dhënë drejtuesit të mjetit procesverbalin përkatës dhe në vijim nuk kryenin arkëtimet dhe nuk bënin pasqyrimet përkatëse në sistem.
Në njoftimin zyrtar të organit të akuzës, thuhet: “Më datë 07.03.2024, 24.01.2024 dhe 26.01.2024, oficerët e Policise Gjyqësore pranë Agjencisë së Mbikëqyrjes Policore, referuan në prokurori veprimtari të kundraligjshme të kryera nga punonjës të Policisë së Shtetit, Seksioni për Sigurinë e Autostradave Milot-Morinë. Për fillimin e veprimeve procedurale hetimore shërbeu një informacion që Shefi i Seksionit të kësaj Njësie, i dërgoi Drejtorisë së Qarkullimit Rrugor dhe Sektorit të Financës në Aparatin e DPPSH për verifikimin e pagesës për disa automjete me targa të huaja, që ishin ndëshkuar për shkelje të ndryshme të Kodit Rrugor dhe në sistemin E-Gjaba për periudhën 01.01.2023 deri në 31.12.2023 dhe rezultonin debitorë.
Gjobat e vendosuara për automjetet me targa të huaja, ishin vjelur në vend nga agjentët verifikues dhe shumat e parave nuk ishin arkëtuar, duke hedhur dyshime të arsyeshme të përvetësimit të tyre nga punonjësit e policisë që i kishin vendosur ato gjoba.
Gjobat e pa arkëtuara të vendosura për automjetet me targa të huaja nga agjentët verifikues të Njësisë së Sigurisë së Autostradave Milot-Morinë për periudhën 01.01.2023 deri në datë 31.12.2023 ishin në vlerën 1,279,000 lekë, që me kamatë vonesat e përllogaritur me 60%, shuma shkon në total rreth 2,123,140 lekë. Kjo shumë e pa arkëtuar për 160 gjoba në total dyshohet se u përvetësua nga punonjësit e Njësisë së Sigurimit të Autostradave Milot-Morinë”.
Masat e sigurisë janë dhënë ndaj këtyre efektivëve:
Krenar Molla – arrest me burg,
Gasper Gjeta – arrest me burg,
Armand Shehu arrest me burg,
Ndoc Pjetri – arrest me burg,
Armir Hallaçi – arrest me burg,
Marjan Bolaj – arrest banese,
Kastriot Gjini – arrest banese,
Gilbert Kapxhiu – arrest banese,
Arsim Braha – detyrim paraqitje,
Gramoz Dafku – detyrim paraqitje,
Shuaip Gjata – detyrim paraqitje,
Artan Pellumbi – detyrim paraqitje,
Agron Nika – detyrim paraqitje,
Zenel Axhemi – detyrim paraqitje,
Asqeri Xhelo – detyrim paraqitje,
Ismail Petku – detyrim paraqitje,
Gjovalin Tushaj – detyrim paraqitje,
Gjelosh Laska – detyrim paraqitje,
Flavio Ademi – detyrim paraqitje,
Bardhok Çupi – detyrim paraqitje,
Alfred Tushaj – detyrim paraqitje.
Gjobat e paarkëtuara të vendosura për automjetet me targa të huaja ishin për periudhën 01.01.2023 deri në datë 31.12.2023, dhe kapnin vlerën 1,279,000 lekë, që me kamatë vonesat e përllogaritur me 60%, shuma shkon në total rreth 2,123,140 lekë. /tesheshi.com/
