Loja Pokemon Go për vetëm dy javë të lansimit ka tejkaluar gjitha pritjet e kompanisë Nintendo. Aplikacioni është shkarkuar më shumë se 30 milion herë. Kjo ka rezultuar me të ardhura prej 35 milion dollarë për kompaninë Nintendo.
Vetëm amerikanët harxhojnë në këtë aplikacion 1,6 milion dollarë në ditë. Kjo shumë i referohet vetëm shfrytëzuesve të Iphone-it, andaj parashihet që Apple prej këtij aplikacioni, brenda dy viteve të ardhshme të përfitojnë deri tre miliardë dollarë.
Meqenëse aplikacioni nuk është në dispozicion në gjithë botën, kompania shpreson që të përfitojë edhe më shumë në të ardhmen. Listës së shteteve me qasje në këtë lojë është i është bashkangjitur edhe Japonia, e cila konsiderohet edhe si vendlindje e Pokemonëve.
Japonia, si një prej tregjeve më të mëdha botërore të këtyre video-lojërave, i është bashkangjitur SHBA-ve, Kanadasë dhe grupit prej 30 vendeve tjera evropiane, në gjuetinë për këto krijesa virtuale.
Pokemonët si lojëra kanë një traditë të gjatë në Japoni, dhe për herë të parë janë paraqitur para 21 viteve. Nostalgjia për pokemonët e parë ka tërhequr numër kaq të madh të lojtarëve.
Koncepti i lojës konsiston në atë se, lojtarët ndërveprojnë me personazhet virtuale përmes lëvizjeve në botën reale.
Për shumë përdorues të Pokemon Go, kërkimi i monstrave nëpër qytet përbën një aktivitet fizik dhe dëfrim.
Por, përdorues tjerë tërheqin vërejtjen për aspektin e sigurisë, për shkak se loja kërkon lëvizje të gjata nëpër rrugë, ndërkohë që lojtari gjatë gjithë kohës duhet të mbajë sytë e ngulitur në telefonin inteligjent. /tesheshi.com/
