Ish-kryeministri britanik Boris Johnson ka kritikuar aleatët evropianë të Ukrainës për qëndrimin e tyre për këtë çështje dhe u bëri thirrje atyre që të ndryshojnë.
Johnson përdori një shprehje të ashpër për të thënë se evropianët po sillen si “pula pa kokë”, duke u bërë thirrje atyre “të ngrihen dhe të lëvizin” në vazhdën e përpjekjes së Donald Trump për të filluar bisedimet e paqes me Rusinë.
Ai madje u bëri thirrje politikanëve në të gjithë Perëndimin që të mos keqinterpretojnë mesazhet nga qeveria amerikane dhe të marrin seriozisht thirrjen e Trump-it për më shumë shpenzime të mbrojtjes nga evropianët.
Johnson, një mbështetës i vendosur i Ukrainës kur ishte në detyrë, tha se deklaratat e Trump-it dhe sekretarit amerikan të Mbrojtjes nuk përbëjnë një ndryshim kursi.
“Duke parë atë që po thotë Trump, duke parë atë që po thotë Hegseth, ata nuk po e tradhtojnë Ukrainën”, argumentoi Johnson, duke shtuar: “Ata nuk po largohen nga Ukraina. Ata thonë se Ukraina duhet të jetë një vend sovran dhe i begatë. Ata thonë se Putini nuk mund të fitojë. Ata thonë se do të vazhdojnë të mbështesin Ukrainën”.
Johnson mbrojti thirrjen e presidentit amerikan për vendet evropiane që të shpenzojnë më shumë për mbrojtjen.
Së fundi, Johnson këmbënguli se Ukraina mund të anëtarësohej ende në NATO, pavarësisht se sekretari amerikan i Mbrojtjes këmbënguli se një gjë e tillë nuk ishte parashikuar: “Nuk mund të jesh një vend sovran nëse je i kufizuar, nëse pengohesh, në një fazë në të ardhmen, të vendosësh nëse do të anëtarësohesh në NATO”. /tesheshi.com/
