Vdekja e një të riu ka tronditur rëndë qytetin e Pogradecit. Viktima dha shpirt në një zonë urbane të populluar, pasi u rrah, por që Policia e serviri si vdekje nga shkaqe natyrore.
Ishte reagimi i familjarëve që çoi në ndryshim version nga Policia, e cila është nën hetim me dyshimin se ka dashur të fshe ngjarjen.
Në zhvillimin e radhës mbi këtë ngjarje, Gjykata e Korçës vendosi masat e sigurisë për katër personat mes të cilëve dhe autorin e dyshuar, të implikuar në vrasjen e 42-vjeçarit Egli Proga, mbrëmjen e së shtunës së kaluar në Pogradec.
Për autorin e dyshuar Denis Meçe gjykata pranoi kërkesën e prokurorisë, duke caktuar masën e sigurisë arrest me burg, ama me akuzën e “vrasjes nga pakujdesia”. Ndërsa për tre personat e tjerë gjykata vendosi detyrim paraqitje, pasi dyshohen se kanë kryer veprën penale të moskallëzimit të krimit.
Kjo ka bërë që familjarët të reagojnë sërish ashpër.
Ishte e motra e viktimës që tha se “po vazhdon të vritet Egli, me çdo veprim dhe mosveprim që është duke u kryer. Kjo është vrasje për herë të tretë.
Po flasim për vrasje me dashje, në bashkëpunim, në masë, të një njeriu të pafajshëm dhe janë lëshuar një tufë huliganësh. Kjo është”.
Ndërsa i afërmi tjetër i viktimës hodhi akuza të forta: “Gjithçka pritet nga këta kriminela. Në qytetin e Pogradecit këta njihen shumë mirë për gjobëvënie, jam pa fjalë. Nuk di çfarë të them. Dua që drejtësia të vihet në vend. Ju lutem mediat të bëjnë të pamundurën, të zbardhin të vërtetën ose nuk e di çtë them. Këta janë kriminela të gjithë në bashkëpunim.”
Sakaq, Prokuroria e Korçës nuk ka bërë të ditur se mbi çfarë provash ka ngritur akuzën e “vrasjes nga pakujdesia” ndaj Denis Meçes, për sa kohë dëshmitarët okularë në vendngjarje e kanë parë që ai ka goditur viktimën, i cili pas rrëzimit ka gjetur vdekjen. /tesheshi.com/
