Në kyçin e saj ka një byzylyk elektronik. Nuk i lejohet ta përdorë celularin apo kompjuterin, e aq më tepër të dalë nga apartamenti i saj. Gjykata vendosi që poetja me nënshtetësi izraelite të nxirret jashtë qytetit, Nazaretit, e si dënim të qëndrojë rreth 40 kilometra larg. Për këtë, vëllai i saj mori me qira një apartament në rrethinat e qytetit, për të jetuar të qetë së bashku. Ai, për t’u kujdesur për të motrën, i ka lënë në mes studimet për bioteknologji, si dhe ka hequr dorë nga puna si infermier.
Një poete, aktiviste dhe fotografe, Dareen Tatour i ka postuar vitet e fundit poezitë e veta, të shkruara të tëra në arabisht, në blogun personal, në Facebook apo në YouTube. Këto janë skenat e krimit të saj, shkruan e përditshmja izraelite Haaretz.
“Jam në shtetin e Izraelit, një demokraci!,” thotë tërë ironi e pezm poetja palestineze e shtrënguar ligjërisht të qëndrojë brenda katër mureve të banesës. “Kurrë nuk e mendoja se do të arrestohesha për poezi!”
Arrestimi i saj është kundërshtuar nga shumë autoritete shtetërore. Madje çështja ka shkuar deri në Gjykatën e Lartë, gjë që ndihmoi në uljen e dënimit me arrest shtëpie. Para kësaj, poetja ka qëndruar në paraburgim në tre burgje të ndryshme, duke pritur procedurat gjyqësore, të cilat zgjasin me muaj të tërë.
Ajo ka shkruar që kur ka qenë fëmijë. Për të shkrimi është gjëja më e rëndësishme në jetë. Në vitin 2010, ajo publikoi librin e saj të parë me poezi në arabisht, Lufta e Fundit. Poezitë i ka postuar në rrjetet sociale të shoqëruara me fotografi të bëra po vetë. Madje, pak muaj para arrestimit, ajo hapi një ekspozitë në Nazaret për të bërë të njohur punën e saj.
Dareen Tatour do të mësonte se akuza konkrete kishte të bënte me një postim në Facebook të poezisë së saj, “Qëndro o populli im, qëndro ndaj tyre”.
Ajo thotë se pasi të përfundojë arresti, do të gjejë një mënyrë për t’u larguar nga vendi i saj, ashtu siç bëjnë shumë artistë të tjerë, të cilët nuk janë të lirë të shprehen, e që nuk e mendojnë jetën duke hequr dorë nga arti i tyre. /tesheshi.com/
