Podcast-et e kryeministri Rama nuk prodhojnë më lajm. I prirur të ftojë personazhe limonadë, edhe pse mund të vijnë nga teknologjia apo biznesi, të cilët nuk i lë të dominojnë në bisedë, në një lloj fjalosjeje pa intrigë e të mërzitshme, ato tentojnë të shpalosin gjithashtu një realitet limonadë të Shqipërisë.
Në të fundit Podcast, ai kishte ftuar një çift të rinjsh të arsimuar, të cilët kishin lënë qytetin e kishin shkuar në fshat për jetuar e ndërtuar biznes. E kish titulluar intrigueshëm “Çifti nga qyteti”, por vetëm kaq. Sigurisht që ka lajm në faktin e zhvendosjes së një çifti të arsimuar nga qyteti në fshat, sot, në një epokë të jetës konsumeriste dhe të përqendruar tërësisht në qytete, por Shqipëria ka dhe realitete jo kaq të karamelta, të cilat kryeministri duhet të ketë guxim t’i ketë përballë në Podcast-et e tij. Le të ftojë dhe njerëz që përcjellin të tjera realitete dhe të cilët i ka kundër. Kjo do e bënte dhe më origjinal e të ndjekur, atë dhe Podcast-in e tij.
Ndërkohë, ajo që u vu re në bisedën me çiftin e të rinjve, ai nga Gjirokastra e ajo nga Korça, zhvendosur në Zhulat të Gjiokastrës, ishte pyetja e Ramës se “ku ndodhet Zhulati?”. Për një kryeministër, ku investimin më të madh në opozitë kishte shkeljen e Shqipërisë pëllëmbë për pëllëmbë, është e pafalshme kjo pyetje. Kjo sepse Zhulati nuk është ndër fshatrat e humbura, por ndër më të njohurit e Gjirokastrës dhe jo larg qytetit. Ëshë një fshat madje me histori dhe emër imponues. Ti mundet të mos kesh qenë fizikisht në Zhulat, por jo mos ta njohësh atë, apo të mos e dish ku ndodhet, mjaft nga fakti që rrugës së re për Sarandë, asaj nga Kardhiqi, haset në tabelat e rrugës. /tesheshi.com/
