Nga Blendi Gashi
Besimtarët muslimanë në Kosovë po festojnë sot Fitër Bajramin me lutjet dhe urimet për paqe, dashuri dhe solidaritet ndaj njëri – tjetrit.
Edhe në manifestimin qendror të mbajtur në Xhaminë e Madhe në Prishtinë, në ligjëratën tematike kushtuar kësaj feste u bë thirrje për respekt, dashuri, solidarizim me njëri-tjetrin, pra edhe thirrje për të ndihmuar të varfërit dhe fëmijët jetimë.
Duke qenë se populli shqiptar në përgjithësi është bamirës, një thirrje e tillë sidomos në festa çdo herë ka dhënë rezultatet e veta ku sadopak ndihmohen një numër i familjeve që janë në gjendje të rëndë ekonomike, siç ka ndodhur edhe sivjet. Por fatkeqësisht edhe shumë skamonorë presin nëse ndonjë njeri i vullnetit të mirë do ju troket në derë dhe do t’ua mbushë sofrën të paktën për festë.
Duke qenë me mendje tek shumë fëmijë që në sofrën e tyre nuk kanë gjërat elementare ushqimore e lëre ndonjë ëmbëlsirë, shtrohet pashmangshëm pyetja: a bëhet një solidaritet i majftueshëm mes njerëzve, apo ka filluar të zbehet bamirësia për shkak të kushteve ekonomike e sociale që e karakterizojnë shoqërinë?
Drejtues të Bashkësisë Islame në disa komuna shprehen të kënaqur me solidaritetin mes njerëzve duke thënë se përkundër gjendjes ekonomike nuk mungon mbështetja për të varfërit.
Orhan Bislimaj, sekretar i Bashkësisë Islame në Prizren, thotë se përkundër papunësise dhe vështirësive ekonomike nuk ka zbehje të solidaritetit të paktën në komunën e tij.
Për më tepër ai thotë se numri i namazfalëzve në teravi këtë vit ka qenë më stabil dhe më i lartë se vitin e kalauar.
“E, zaten, këta njerëz edhe janë të dhënë për solidaritet. Mbase, kjo është arsyeja që solidariteti nuk ka rënie. Ne, këtu në Këshillin e Bashkësisë Islame të Prizrenit, kemi pranuar shumë donacione, që i kemi shndërruar në pako ushqimore, dhe jemi duke i shpërndarë me ditë të tëra, te familjet e varfëra”, thotë Bislimaj, për tesheshi.com.
Edhe kreu i Bashkësisë Islame në Malishevë, mulla Xhevat Kryeziu, thotë se humanizmi në mes njerëzve po vazhdon edhe përkundër gjendjes jo aq të mirë sociale të shoqërisë.
“Edhe në këtë festë të madhe, pra të Fiter Bajramit, pas muajit të shenjtë të Ramazanit i madhi Zot na thërret t’i ndihmojmë atyre familjeve që kanë nevojë në mënyrë që t’ia begatojmë sofrën për ditën e Bajramit.
Konsideroj se humanizimi është në rritje e jo në rënie. Në Komunën e Malishevës humanizimi mes njerëzve është i madh por duhet të vazhdoj edhe më shumë sepse kemi nevojësi si shoqëri kosovare. I bëj thirrje të gjithë atyre që kanë mundësi t’i ndihmojnë aq sa munden njerëzit skamnor, familjet e dëshmorëve e personat me nevoja të veçanta”, thotë mulla Xhevati, përtesheshi.com.
Kujtojmë se numri i familjeve kosovare të cilat jetojnë në varfëri e të cilat marrin asistencë sociale është mbi 25 mijë, me mbi 100 mijë anëtarë. /tesheshi.com/
