Nga Blendi Gashi
Isa Mustafa padyshim është politikani më dinak në skenën politika kosovare. Këtë e ka dëshmuar disa herë ku për t’u rehatuar në karrigen e pushtetit ka tradhtuar si bashëpartiak ashtu edhe kundërshtarë politik nga partitë tjera.
Dy tradhtitë më të mëdha që bëri Mustafa janë ajo ndaj shefit të tij Fatmir Sejdiu (tashmë kryetar nderi i LDK-së) në vitin 2010 ku e rrëzoi nga karrigia e kreut të partisë ndonëse në vazhdimësi deklaronte në media se nuk do jetë kundërkandidat. Edhe vet Sejdiu në deklarimet për media ka bërë të ditur se Mustafa i ka thënë në sy se nuk do të kandidohej për të parin e LDK-së, e që në fund nuk e mbajti fjalën.
Një skenar i ngjashëm tinëzar Mustafa e përsëriti edhe disa vite më vonë në rastin e të ashtuquajturit blloku opozitar VLAN, (marrëveshja LDK-VV-AAK-NISMA), që u prish pas një bashkëpunimi disa mujor.
Gishti për prishjen e VLAN-it edhe sot nga VV, AAK e NISMA drejtohet kah Mustafa të cilin e konsiderojnë tradhtar për shkak se pamundësoi ndryshimin e qeverisjes në vend.
Ashtu siç pritej Mustafa pas tradhtisë që bëri ndaj Kurtit, Haradinajt e Limajt u hedh në krahët e Thaçit dhe me dinakërinë e tij arriti të marrë postin më të lartë, atë të kryeministër nga një humbës i zgjedhjeve.
“Lufta” me Thaçin
Tre vjet pas marrëveshjes me Thaçin kur zërat për prishjen e koalicionit qeverisës PDK-LDK po rriten, Mustafa papritmas për herë të parë i ka dalë kundër edhe presidentit.
Këtë e bëri dje duke deklaruar se “ushtria nuk do të formohet pa mbështetjen e SHBA-së dhe NATO-s”, duke dalë haptas kundër iniciativës së Thaçit që ushtria të themelohet me ndryshim të ligjit për FSK-në.
Duke parë këtë kundërshtim të Mustafës, shtrohet pyetja se a po tenton ai me taktikën e tij të “djegë” edhe Thaçin?
Sigurisht se Thaçin e ka tejet të vështirë ta “djeg”, pasi ai mban pozitën e kreut të shtetit, por duke dalë kundër tij po dëshiron të fuqizohet para partisë së tij por edhe para opinionit, sepse nëse Thaçit i dështon iniciativa, atëherë si kryetar i LDK-së kundërshtimin e tij do ta përdorë para elektoratit duke thënë se e ruajti miqësinë me faktorin ndërkombëtarë, pasi është i vetëdijshëm se koalicioni qeverisës i ka ditët e numëruara.
Ky kundërshtim i Mustafës nëse veç mbetet i palëkundur mund të jetë dhe një lloj hakmarrje ndaj Thaçit për mosinformim për iniciativën e ndërmarrë (zv.kryeministri nga LDK Ramiz Kelmendi ka thënë se presidenti nuk e ka informuar kryeministrin për iniciativën për bërjen e ushtrisë) dhe t’ia pamundësojë Thaçit që t’i marrë meritat për themelimin e ushtrisë.
Për të mësuar saktë nëse do ketë prishje përfundimtare të raporteve Thaçi-Mustafa duhet pritur javët në vazhdim.
Por një gjë është mëse e qartë se nëse bie iniciativa e Thaçit, pra ushtria nuk themelohet, atëherë do bjerë edhe qeveria dhe vendi do shkojë në zgjedhje të reja./tesheshi.com/
