Në katër komuna në veri të Kosovës ku serbët përbëjnë shumicën, të premten do të përfundojë procesi i riregjistrimit të automjeteve nga targat e Serbisë në Kosovë.
Zëvendësdrejtori i Policisë për rajonin verior, Veton Elshani, tha se deri më tani numri i targave ka arritur në 3400 dhe se për shkak të interesimit të madh, Qeveria e Kosovës ka marrë vendim që afati për ripërdorimin e targave ilegale të shtyhet deri më 15 dhjetor.
Kështu, pas skadimit të këtij afati, qytetarëve që nuk i kanë regjistruar veturat do t’u ndalohet drejtimi i automjeteve, ndërsa veturat e tyre do të konsiderohen të paregjistruara.
Për gati tre vjet, mosmarrëveshja për targat ka nxitur tensione midis Serbisë dhe Kosovës, e cila shpalli pavarësinë në vitin 2008, dhe pjesa veriore e së cilës është shtëpia e një pakice serbe të mbështetur nga Beogradi.
Pothuajse 50 mijë serbë etnikë që jetojnë në Kosovë refuzojnë të njohin autoritetin e Prishtinës dhe ende konsiderohen pjesë e Serbisë dhe Beogradi zyrtar thekson se nuk do ta njohë kurrë pavarësinë e Kosovës.
Qindra oficerë policie, gjyqtarë, prokurorë dhe nëpunës të tjerë civilë nga pakica serbe lanë punën e tyre vitin e kaluar pasi Prishtina vendosi që serbët vendas duhet të zëvendësojnë më në fund targat e makinave serbe me ato të Kosovës.
Prishtina ka kërkuar nga serbët e Kosovës që të zëvendësojnë targat serbe me targa të Kosovës, që është masë reciproke sepse Beogradi po udhëheq një politikë të tillë ndaj Kosovës.
Por serbët e Kosovës iu përgjigjën vendimit reciprok të Prishtinës duke vendosur postblloqe dhe herë pas here duke u përleshur me policinë përpara se paqeruajtësit e NATO-s të ndërhynin për të hequr bllokadat.
Në Bruksel, më 23 nëntor, me ndërmjetësimin e Bashkimit Evropian, Kosova dhe Serbia arritën një marrëveshje për targat. /tesheshi.com/
