Nga Arseola Mulaj
Mendojeni për një çast sikur testimi për bluzat e bardha, të shpallej dhe për ata të togave të zeza, më saktë njerëzve të drejtësisë. Afërmendsh, kjo do ishte më e përligjur pasi, nëse për mjekët dhe infermierët pakkush dyshon në profesionalizmin e tyre, veç moralitetit – nuk ka tregues që shpallin si emergjënte situatën e nivelit profesional në shërbimin shëndetësor – tek drejtësia ndryshon puna. Aty veç moralitetit, dyshimet janë dhe për aftësi profesionale të mangëta, ndonëse dhe kjo i atribuohet moralitetit të cunguar. Sokol Tona, gjyqtar i njohur i Gjykatës së Tiranës, e quan paradoksale sikur të ndodhte një gjë e tillë, duke sjellë për argument betimin që bën njeriu i drejtësisë kur nis karrierë, ndonëse një betim akoma më të madh e kanë dhe mjekët, atë të Hipokratit. Për gjykatësin Tona, edhe mendimi se i gjithë sistemi i drejtësisë ose ai gjyqësor në veçanti, është i korruptuar, ka doza të mëdha subjektivizimi…
A mendoni se e meriton sistemi i Drejtësisë gjithë atë gjykim negativ që vjen për të nga të gjitha anët? Mendimet janë subjektive dhe u përkasin njerëzve. Por nëse e shoh në syrin e gjyqtarit, kjo është një shkelje juridike. Gjykimi i një vendimi të formës së prerë përbën një gabim juridik. Por mendimet janë subjektive. Sipas meje, gjygjësori ka plot të pakorruptuar që ne i njohim.
Shqipëria vuan sot problematika të thella shoqërore, ku thuhet se ndër shkaqet është drejtësia e munguar. Pajtoheni me këtë?Ligjet po përmirësohen, ndërhyrjet në legjislacion kërkojnë përmirësimin dhe ndikimin për mirë të çështjeve të trajtuara në gjykatë në problematikat e tjera të shoqërisë. Një rast konkret për shembull: Me ndërhyrjet e fundit në legjislacionin shqiptar, falja që i bën një grua të shoqit gjatë procesit të gjykimit të tij në gjykatë, nuk përbën lehtësi për të. Kjo çështje lidhet me dhunën në familje. Kur një rast dhune është denoncuar, edhe nëse denoncuesi e fal të paditurin, çështja ndaj tij nuk mund të pushohet. Kjo është një ndërhyrje që ndikon në aspektin social të shoqërisë.
Nëse dhe karshi jush do të shpallej testi që është shpallur ndaj mjekëve,a do ta pranonit?Kjo është paradoksale, pasi gjyqtarët para se të emërohen bëjnë një betim. Një betim i cili ka peshë dhe nuk mund të shkelet. Betimi është me shumë se një provim për një gjyqtar.
Nëse do ta kishit ju në dorë nisjen e një reforme në drejtësi, nga do e nisnit dhe ku do të ndërhynit më tepër? Ne kemi një etikë e cila nuk na lejon të flasim mbi disa tema të caktuara dhe nuk na lejon të bëjmë hamendësime. /tesheshi.com/
