Komiteti Ndërkombëtar i Shpëtimit (IRC) ka ngritur shqetësimin për përshkallëzimin e dhunës në Bregun Perëndimor, duke bërë të ditur se të paktën 224 fëmijë palestinezë janë vrarë që nga janari i vitit 2023. Kjo shifër përbën gjysmën e të gjitha viktimave fëmijë në këtë territor që prej fillimit të regjistrimeve nga OKB në vitin 2005.
“Shtimi i dhunës po shkakton trauma të thella dhe po pengon përpjekjet tona dhe të organizatave partnere për të ndihmuar komunitetet më të goditura, si Jenini,” thuhet në deklaratën e IRC.
Në këtë qytet, IRC ka bashkëpunuar me organizatën palestineze Teacher Creativity Center (TCC) për të ndihmuar fëmijët e prekur nga konflikti, duke përshtatur klasat dhe duke trajnuar mësuesit për t’u përballur me traumat. Megjithatë, “operacionet e vazhdueshme ushtarake, përfshirë sulmet ajrore”, e kanë bërë pothuajse të pamundur ofrimin e këtyre shërbimeve në mënyrë të sigurt.
“Që nga janari, IRC dhe TCC janë detyruar të pezullojnë aktivitetet arsimore në Jenin, duke lënë rreth 200 fëmijë pa mbështetjen e nevojshme për zhvillimin e tyre emocional dhe social,” vijon deklarata.
Për momentin, këto shërbime janë zhvendosur në Ramallah, ku situata është disi më e qetë, por fëmijët vazhdojnë të jenë të ekspozuar ndaj dhunës së përditshme nga ushtria dhe kolonët izraelitë. /Tesheshi.com/
