Nga Blendi Gashi
Ramush Haradinaj, saktësisht edhe një muaj e katër ditë do mbetet në Francë për të mësuar vendimin nëse do lirohet apo ekstradohet në Serbi.
Vendimi i marrë sot gjykata e Kolmarit në Francë për shtyrje të vendimit më 6 prill ka bërë që të plasin reagime të mëdha duke ndërlidhur mbajtjen peng të tij me çështjen e Demarkacionit me Malin e Zi, por edhe të “Zajednicës”.
Se është peng politik e tha edhe vet Haradinaj, por që drejtoi gishtin vetëm tek politika serbe, e në mënyrë indirekte sigurisht e drejtoi gishti edhe nga skena politike kosovare.
Se po bëhen lojëra me Ramushin nuk ka fjalë. Por pyetja kyçe shtrohet se kush me të vërtetë po bën këtë lojë të pistë?
Qeveria e Kosovës përmes një kumtese thotë se “lojëra të ulëta po bën Serbia për përfitime politike dhe duke keqpërdorur drejtësinë po përpiqet të dëmtoj imazhin dhe personalitetin e Haradinajt”.
Por për AAK-në dhe parti tjera opozitare lojërat po bëhen pikërisht në Kosovë me të vetmen arsye që Ramushi të mbahet larg derisa të ratifikohet Demarkacioni me Malin e Zi, marrëveshje e cila pritet të rikthehet në Kuvend për ratifikim gjatë këtij muaji.
Shefi i grupit parlamentar të AAK-së, Pal Lekaj, vendimin për liderin e partisë së tij e cilësoi politik, dhe kërkoi ndërprerjen e seancës së sotme plenare, por që nuk u mor parasysh kërkesa e tij.
Ai, haptazi para ligjvënësve, mbajtjen e Haradinajt në Francë e lidhi me Demarkacionin.
“Kërkoj që të ndërpritni këtë seancë dhe të reflektoni sa nuk është bërë vonë. E kuptoj që Ramushi është peng i shumë të këqijave që i ndodhin vendit, ndoshta edhe i riprocedimit të demarkacionit dhe nëse është fjala për këtë procedone dhe mos e mbani peng”, tha Lekaj.
Edhe deputeti i Vetëvendosje-s, Rexhep Selimi, mbajtjen peng të Haradinajt e ka lidhur me fatin e Asociacionit dhe Demarkacionit.
“Lista Serbe po kthehet në Kuvend. Qeveria po e sjell demarkacionin për tu proceduar…Koha për veprim kundër padrejtësive!”, thotë Selimi.
Se qeveria po dëshiron t’i kryejë Demarkacionin e Asociacionin në mungesë të Haradinajt e thotë edhe Anit Haradinaj, gruaja e liderit të AAK-së.
“Unë besoj që është vendim politik, lojë politike dhe mendoj që këta po donë t’i kryejnë punët çka ju kanë mbet në gjysmë dhe po mendojnë që Ramushi po ju pengon a në fakt po ju mungon pazotësia e tyre. Nuk e di çfarë të them. Nuk është puna vetëm për Demarkacionin, por për të gjitha punët. Kosova vazhdimisht po ka probleme e nuk ditën të dalin kurrë prej tranzicionit”, ka thënë ajo, për mediat kosovare.
Më i ashpër në drejtim të pushtetit është deklaruar deputeti i AAK-së, Lahi Brahimaj, i cili ka quajtur institucionet si të pa fytyrë dhe të pa vlerë.
“Vendimi për shtyrjen e vendimit për Ramushin është konstatim i mjerimit të lidershipit të Kosovës. Sa të pa vlerë që jeni ju krerët e institucioneve të Kosovës por ky mjerim është se jeni të paftyrë. Reagimi juaj në këtë pengmarrje është reagim i ‘gëzimit të heshtur’, por kinse protestues. Ju ju mban serviliteti. Shpresa juaj e shpëtimit personal është serviliteti. Jeni të tmerruar se sdo të kaloj demarkacioni e kurrë asociacioni“, ka shkruar Brahimaj në Facebook.
Në shenjë pakënaqësie ndaj vendimit për Haradinajn, seancën e sotme plenare e bojkotuan deputetët e opozitës, derisa seanca vazhdojë normalisht, ku deputetët e partive në pushtet dhe ministri i Jashtëm Enver Hoxhaj shprehën zhgënjimin e tyre për mos lirimin e kreut të AAK-së.
Ramush Haradinaj, është arrestuar më 4 janar nga policia franceze në bazë të një fletëarresti të lëshuar nga Serbia në vitin 2004. /tesheshi.com/
