Nga Blendi Gashi
Presidenti Thaçi, përkundër kundërshtimeve të SHBA-së dhe NATO-s, të mërkurën mbrëma në një konferencë për media të mbatjur në Presidencë, bëri të ditur qëndrimin se nuk tërhiqet nga iniciativa për ushtrinë duke thënë se nuk ka kthim mbrapa.
Duke qenë politikani më i afërt me ndërkombëtarët pas Rugovës, Thaçi me këmbëngulësinë e tij ka befasuar jo pak kundërshtarët e tij politik dhe në përgjithësi opinionin e gjërë.
Botërisht dihet se në çdo vendim të madh që ka marrë Thaçi është thirrur në mbështetjen ndërkombëtare, derisa siç dihet, për Demarkacionin ka sulmuar jo pak opozitën duke e quajtur anti-amerikane.
Andaj, qëndrimi i tij i prerë si kurrë më parë kundër fjalës së ndërkombëtarëve, pashmangshëm shtron pyetjen mos vallë Thaçi ka në heshtje mbështetjen e të huajve për themelimin e ushtrisë?
Ministri i FSK-së, Haki Demolli beson që presidenti Thaçi i ka bashkërenditur veprimet me partnerët ndërkombëtar për formimin e ushtrisë.
Ai në një intervistë për mediat kosovare ka shprehur bindjen se raportet e Kosovës me SHBA-të, NATO-n dhe partnerët tjerë nuk do të luhaten pas veprimeve të fundit të institucioneve të Kosovës.
Se ka një marrëveshje paraprake mes presidentit Thaçi dhe ndërkombëtarëve duan të besojnë edhe deputetët.
Armend Zemaj, deputet i LDK-së në një emision televiziv ka thënë se “dua të besoj se ka një koordinim me ndërkombëtarët për ushtrinë”.
Ndërsa si presidenti Thaçi ashtu edhe kryekuvendari Kadri Veseli, kanë shprehur bindjen se SHBA do ta përkrahë ushtrinë dhe nuk do e pengojnë rritën e saj, duke nënkuptuar në një mënyrë pajtimin e heshtur të ndërkombëtarëve.
Se ushtria po bëhet me lejen e ndërkombëtarëve janë shumë të bindur qytetarët e Serbisë ku shumica prej tyre në komentet që kanë shkuar në portalet kryesore beogradase, “B92”, “BLIC”, “Danas”, “Politika”, “Kurir”, etj, pohojnë se kjo nismë është kryekëput në marrëveshje me fuqitë kryesore dhe se, njëherësh, komentet e nga shtetet e Perëndimit janë një fasadë dhe ndihmesë për kryeministrin serb në largim, Aleksandar Vuçiq, në prag të zgjedhjeve presidenciale në Serbi.
Për të parë nëse SHBA e NATO do mbështesin apo jo ushtrinë pa miratimin e tyre, duhet pritur një qëndrim të ri të Ambasadës së SHBA-ve por dhe NATO-s, pas miratimit eventual nga deputetët të ligjit që e shndërron FSK-në në ushtri.
Megjithatë, tashmë Thaçi ka hequr përgjegjësinë nga vetja duke e lënë në dorën e Mustafës, nëse do e procedojë apo jo projektligjin për ushtrinë në Kuvend.
Ndërsa mbetet enigmë përkrahja në heshtje apo jo e ndërkomëtarëve për iniciativën e Thaçit, ajo që dihet është se tashmë presidenti për herë të parë ka mbështetjen edhe të partive opozitare, Vetëvendosje, AAK, NISMA, derisa LDK si partner qeverisës nuk e ka pritur mirë iniciativën pasi ndihet e anashkaluar.
