Një gazetare ruse, e cila punonte për një nga grupet më të mëdha mediatike të Rusisë, të mbështetur nga Kremlini, u vra në një incident me të shtëna në një terren stërvitor ushtarak në Krime, thanë zyrtarët e emëruar nga Rusia dhe media shtetërore.
Svetlana Babayeva drejtoi zyrën e grupit mediatik Rossiya Segodnya në Simferopol, qyteti i dytë më i madh në gadishullin e Krimesë, të cilin Rusia e aneksoi në 2014.
Agjencia ruse e lajmeve RIA Novosti, një degë e Rossiya Segodnya, raportoi se Babayeva u vra nga një plumb qorr gjatë ushtrimit të të shtënave. Ajo nuk dha detaje të tjera.
Zyrtarët pro-rusë i bënë homazhe Babayevës në postimet e mediave sociale. Sergei Aksyonov, guvernatori rus i Krimesë, e quajti vdekjen e saj një humbje të pariparueshme.
“Svetlana bëri shumë për të përcjellë te publiku të vërtetën për atë që po ndodh në provincën Kherson”, tha Vladimir Saldo, kreu i autoriteteve pushtuese ruse në provincën jugore të Ukrainës, Kherson.
Zëdhënësja e Ministrisë së Jashtme ruse Maria Zakharova shkroi në faqen e saj në Telegram: “Të dua shumë, Sveta”.
Ukraina ka vendosur sanksione ndaj grupit Rossiya Segodnya, duke e quajtur CEO-n Dmitry Kiselyov “një figurë qendrore në propagandën e qeverisë që mbështet vendosjen e trupave ruse në Ukrainë”.
Në një deklaratë të postuar nga RIA Novosti, Kiselyov tha se Babayeva ishte një “person i ngrohtë që mbështeti fuqishëm Rusinë” dhe “dëshironte të mbështeste heronjtë tanë”. /tesheshi.com/
