Ambasada Amerikane në Tiranë ka reaguar me anë të një deklarate për rastin e kërcënimit të gazetares Klodiana Lala, pas plumbave në shtëpinë e prindërve të saj në Laknas të Tiranës, duke kërkuar që autorët sa më shpejt të zbulohen e ndëshkohen.
Sipas përfaqsisë së Uashingtonit në Tiranë, akt kriminal si mesazh ndaj gazetares, tregon frikën e krimit.
“Ambasada e Shteteve të Bashkuara dënon me forcë sulmin ndaj gazetares Klodiana Lala dhe familjes së saj.
Ne nxisim autoritetet shqiptare të kryejnë një hetim tërësor dhe transparent për të nxjerrë autorët përpara drejtësisë. Si gazetare, Klodiana ka luajtur një rol të rëndësishëm në mbulimin e reformës në drejtësi, çështjeve të gjyqësorit dhe veprimtarisë kriminale.
Fakti që ajo u vu në shënjestër demonstron rëndësinë e punës së saj – sjellja e së vërtetës tek populli shqiptar. Një media e pavarur është frymëmarrja e një demokracie të fortë.
Akte frikacake si ky tregojnë se kriminelët kanë frikë sa më shumë Shqipëria i afrohet një drejtësie të vërtetë”, thuhet në reagimin e Ambasadës. /tesheshi.com/
