Ndër qëndrimet e disa zërave politikë, mediatikë e shoqërore lidhur me rastin e gazetares Klodiana Lala, në familjen e prindërve të së cilës u qëllua me armë, ka qenë dhe ai i Gjykatës së Lartë. Dhe vetëm i kësaj gjykate dhe jo të tjerave, si fjala vjen ajo e Apelit apo ajo Kushtetuese.
“Ngjarja e rëndë ndaj Znj. Lala, dhe rreziku që iu kanos sot pjesëtarëve të familjes së saj, përbën një shqetësim serioz për të gjithë qytetarët dhe shoqërinë shqiptare, e cila është e interesuar për sigurinë dhe mirëqenien e kujtdo invidi, në ushtrimin e çfarëdo funksioni në shërbim të së vërtetës.
Gjykata e Lartë, duke vlerësuar raportin korrekt me gazetaren Lala dhe profesionalizmin e saj, i drejtohet organeve kompetente për zbardhjen sa më të shpejtë të kësaj ngjarje dhe vënien përpara drejtësisë së autorëve të këtij akti të shëmtuar”, thuhet ndër të tjera në një reagim të Gjykatës së Lartë për rastin në fjalë.
Po pse dhe me ç’tagër? Mban qëndrime politika, pasi e ka në natyrë e saj t’i përfshijë në interpretim ngjarje me sensitete të tilla; deklarohet qeveria, rendi, pasi kanë rol ekzekutiv; shprehet media gjithashtu, pasi është grup interesi. Bëjnë dhe ambasadat deklarata, si monitorues të çdo zhvillimi në vend.
Ndërsa ndonjë instancë gjyqësori në këtë rast, nuk kanë asnjë tagër për t’u shprehur, as specifikisht e as kortezialisht. Klodiana Lala është gazetare kronike, por jo personazh gjyqësori.
Nga ana tjetër, Gjykatës së Lartë dhe çdo instance tjetër gjyqësori i takon të shprehet vetëm për çështje që kanë të bëjnë specifikisht me profilin dhe funksionin. Ato nuk mund të dalin jashtë këtij profili për t’u shprehur për çështje të natyrave të tjera, qoftë dhe në emër të keqardhjes njerëzore apo ndonjë sentimenti tjetër shoqëror.
Sepse, nëse Gjykata e Lartë u shpreh për rastin “Lala”, pse nuk e ka bërë të njëjtën gjë Apeli apo Kushtetuesja?
Nuk është çështje dëshire apo zgjedhje, është çështje serioziteti! /tesheshi.com/
