Banesa e prindërve të gazetares së njohur të kronikës Klodiana Lala është sulmuar me armë në orët e para të mëngjesit. Ngjarja ka ndodhur në Laknas, në periferi të Tiranës, për fat pa pasoja në njerëz, pasi sicc mund të kuptohet, bëhet fjalë për një mesazh kërcënues. Klodiana Lala është ndër gazetaret më aktive në profilin e saj, së bashku me kolegun Artan Hoxha, duke guxuar të denoncojnë krimin në nivelet më të larta.
Ka reaguar menjëherë kreministri Rama, duke ofruar mbështetje dhe premtuar kapje të autorëve.
“E patolerueshme barbaria mbi shtëpinë e gazetares Klodiana Lala! Ngjarja duhet zbardhur sa më parë dhe strukturat e shtetit janë të angazhuara maksimalisht. Mbështes e inkurajoj Klodianën në këtë moment kritik dhe pres me padurim ndëshkimin e keqbërësve”, shkruan Rama në rrjetin social.
Nga ana tjetër, kryedemokrati Basha e ka lidhur rastin me atë që e konsideron krim qeveritar.
“Mesazhi mafioz për gazetaren është i qartë:se kush del nga rreshti, kush shqetëson qeverinë, kush nuk i bindet sundimit të krimit, e ka fundin e shpejtë. Dua të shpreh vendosmërisht mbështetjen time dhe të Partisë Demokratike për çdo gazetar të papërkulur nga krimi, të pablerë nga kjo qeveri që, prej 5 vjetësh, nuk u shërben qytetarëve, por bashkëqeveris me krimin”, tha Basha. /tesheshi.com/
