Policia e Hamburgut e konsideron si një incident të izoluar sulmin në kishën e Dëshmitarëve të Jehovait, ku mbetën të vrarë shtatë persona, njoftoi agjencia dpa, duke cituar burime të sigurisë.
Nuk ka të dhëna se autori i masakrës është në arrati dhe mund të jetë mes të vdekurve, raporton Bild duke cituar burime policore.
Mediat gjermane shtojnë se ende nuk dihen motivet e sulmit.
Një autor i panjohur qëlloi për vdekje të paktën shtatë persona dhe plagosi disa të tjerë në sallën e Dëshmitarëve të Jehovait në Hamburg.
Paraprakisht policia u ka bërë thirrje banorëve përmes një aplikacioni alarmues që të strehohen dhe të mos dalin nga shtëpitë për sa kohë autori ose autorët janë në arrati.
“Kërkoni strehim sa më shpejt të jetë e mundur”, thuhej në mesazh.
Njëkohësisht, apelohen qytetarët që të mos përhapin informacione të pasakta përmes rrjeteve sociale.
Vendi i sulmit është rrethuar nga policia dhe forcat speciale tashmë ndodhen aty.
Gazeta lokale Hamburger Morgenpost raporton se 17 persona janë plagosur lehtë.
Mësohet se përfaqësues të policisë do të prezantojnë detajet e ngjarjes dhe rezultatet e hetimit në një konferencë për mediat pasditen e sotme.
Deklaratat e dëshmitarëve
Gregor Miesbach, i cili jeton jo shumë larg ndërtesës ku ndodhën të shtënat, tha se dëgjoi të shtëna dhe regjistroi një person që hynte në ndërtesë nga një dritare.
Ai ka thënë se të shtënat janë qëlluar më pas brenda ndërtesës.Ai i tha agjencisë gjermane NonstopNews se kishte dëgjuar të paktën 25 të shtëna.
Studentja Laura Bauch, e cila gjithashtu jeton në lagje, tha për DPA se ka pasur “katër kohë të të shtënave”.
“Ka pasur disa të shtëna në këto periudha që ndodhën në intervale nga 20 sekonda deri në një minutë”, theksoi ajo, duke shtuar se nga dritarja pa një person që vraponte nga kati përdhe në katin e dytë të sallës së Dëshmitarëve të Jehovait. /tesheshi.com/
