Debati mbi importin e mbetjeve ka sjellë një zhvillim të rëndësishëm tek opozita shqiptare. Lulzim Basha pranoi më në fund se gjatë qeverisjes së PD-së ka patur një stok me gabime, porse ëshët reflektuar mbi to.
“Ne vijmë si një forcë politike që ka reflektuar. Edhe ne kemi pasur stokun tonë të gabimeve, por duhet të jemi krenar se çfarë arritën dhe kokulur duhet t’i themi shqiptarëve që kemi gabuar, por kemi reflektuar për të shkuarën. Aleanca jonë nuk e kërkon votën për të sjellë në pushtet PD-në, por qytetarin e dhunuar, të harruar nga vjedhja qeveritare. Aleanca jonë është ajo me qytetarin dhe popullin shqiptar”, tha kreu i PD-së gjatë një takimi me të rinjtë demokratë të Durrësit.
Ky zhvillimi vjen pas një “pendese politike” si të Bashës ashtu edhe të Berishës, për ligjin e tyre të mbetjeve në fund të mandatit, që më pas u shfuqizua nga të majtët sapo erdhën në pushtet.
Por duhet thënë se ky është rasti i parë në tre vjet që lidershipi i PD-së fut në fjalor fjalën “gabim” dhe “pendesë”. Dhe do duheshin “plehrat” që të ndodhte kjo, që edhe kështu ngjajnë si më tepër politike. /tesheshi.com/
