Seanca e sotme në parlamentin shqiptar nuk u ka ngjarë atyre me sherrnajë. E qetë e normale, ajo është karakterizuar vetëm nga gjuha e zakonshme, ajo e akuzave nga opozita dhe e mbrojtjes prej tyre nga mazhoranca.
Temë dite ishin incerenatorët, pas një interpelance të kërkuar nga deputetja demokrate Jorida Tabaku, ndaj ministrit Gjiknuri.
Znj. Tabaku i quajti skema mafioze kontratat për incineratorët.
“Prej tre muaj i kërkoj qeverisë dhe ministrave dosjen ndërkohë që vetëm dy ditë më parë më kanë vënë në dispozicion procedurën për koncesionin vetëm për incineratorin e Fierit, asgjë për Elbasanin dhe asgjë për Tiranën. Pse e gjithë kjo skemë mafiozë u zbatua në funksion të dhurimit të një koncesioni një personi të vetëm në të tre qytetet. Aq i rëndësishëm ishte ky koncesion për qeverisë saqë vendosi vendosi të përshpejtojë 9 procedura në një ditë të vetme”.
Nga ana e tij, Gjiknuri u mbrojt duke thënë se transparenca ka qenë e plotë.
“Nuk ka munguar transparenca për të vënë në dispozicion çdo kontratë publike. Çështja e mbetjeve është një nga sfidat që ka jo vetëm Shqipëria, por edhe bota. Pra mbetjet është një nga sfidat bazë dhe menazhimin i mbetjeve urbane është edhe përgjegjësi e autoriteteve lokale, por vendorët nuk i kanë kapacitetet kështu që roli i qeverisë është i pandashëm. Nisur nga roli i qeverisë iniciativa e PPP mbetet e vetmja formë që është e provuar jo vetëm në Shqipëri, por në të gjithë botën e zhvilluar, mbetet e vetmja zgjidhja”, tha Gjiknuri. /tesheshi.com/
