Dy plazhe në Australinë Jugore janë mbyllur pasi qindra peshq të ngordhur u hodhën në breg dhe shkuma e bardhë mbuloi pjesën më të madhe të vijës bregdetare.
Surfistët që laheshin në zonë raportuan probleme shëndetësore, gjë që ngriti shqetësime midis autoriteteve lokale dhe shkencëtarëve.
Shkencëtari Sam Gaillard nga Agjencia e Mjedisit të Australisë Jugore beson se një lulëzim i mikroalgave, i shkaktuar nga kushtet e pazakonta të motit, është shkaku më i mundshëm i këtij fenomeni. Ndonëse raste të tilla nuk janë të rralla gjatë sezoneve të caktuara, ky është një incident me përmasa të jashtëzakonshme. Plazhet Waitpinga dhe Parsons, të vendosura në jug të Adelaide, janë të mbyllura për publikun për arsye sigurie.
Dëshmitarët raportuan sasi të mëdha peshqish të ngordhur në breg, ndërsa shkuma e bardhë mbulonte qindra metra plazh. Surferët kanë raportuar acarim, dhimbje të syve, dhimbje të fytit dhe kollë pas notit në zonë.
Shkencëtarët morën mostra të shkumës, e cila dyshohet se është rezultat i dekompozimit të organizmave toksikë. Gaillard njoftoi se rezultatet e analizave mund të dihen deri në fund të javës. Ai gjithashtu paralajmëroi se valët e intensifikuara mund të shkaktojnë formim edhe më të madh të shkumës.
Edhe pse fenomene të ngjashme ndodhin ndonjëherë në këtë zonë, përmasat dhe pasojat e mundshme të këtij incidenti kanë shqetësuar ekspertët dhe autoritetet lokale. Qytetarët këshillohen të tregojnë kujdes ndërkohë që autoritetet hetojnë situatën për të garantuar sigurinë e njerëzve dhe ekosistemeve. /tesheshi.com/
