Eshtë hedhur sot shorti i play-off-eve në Ligën e Kampionëve dhe në Ligën e Europës.
I eliminuar nga Salcburgu në Champions League, Partizani do ta vijojë pjesëmarrjen në Ligën e Europës, ku do të ndeshet me skuadrën ruse të Krasnodarit.
Ndërsa Shkëndija e Tetovës do të ketë për kundërshtar belgët e Gentit në të njëjtën veprimtari, në Ligën e Europës.
Ndeshjet e para do të luhen më 18 gusht, e ato të kthimit një javë më pas, më 25 gusht. Si Partizani, ashtu dhe Shkëndija e Tetovës, do të jenë udhëtues në takimet e para.
Nga çiftet që ka vënë përballë shorti i Champions League-s, spikasin përballjet Porto – Roma dhe Vilareal – Monako.
Po ashtu, Dinamo e Zagrebit do të ndeshet me Salcburgun, Steaua e Bukureshtit me Mançester Sitin, e Ajaksi me Rostovin.
Takimet e para të play-off-it të Champions League-s do të luhen më 16 e 17 gusht, kurse ndeshjet e kthimit janë më 23 e 24 gusht.
Në Ligën e Europës veçohen sfidat Brondbi – Panathinaikos, Astra – Uest Hem, Austria e Vjenës – Rosenborg, Sllavia e Pragës – Anderleht, Fenerbahçe – Grasshoper, Istanbul Bashakshehir – Shakhtar i Donjeckut dhe Sasuolo – Crvena Zvezda. /tesheshi.com/
