Platini nuk përmbahet për Blatter-in: egoisti më i madh që më kanë zënë sytë

Michel Platini dhe Sepp Blatter nuk drejtojnë më asnjë prej institucioneve të futbollit, as UEFA-n e as FIFA-n. Të dënuar për shkelje gjatë punës së tyre shumëvjeçare, atyre u ka mbetur vetëm të kapen me njëri-tjetrin.

Francezi ka shpërthyer ndaj zvicerianit në të përditshmen Le Monde, duke mos lënë gjë pa thënë për të.

Platini e ka akuzuar Blatter-in se u përpoq të shpëtonte lëkurën kur shpërtheu skandali për pagesat e kryera mes dy zyrtarëve kohë më parë.

“Blatter nuk mbron askënd  tjetër; ai kurrë nuk më mbrojti mua. Ai është egoisti më i madh që më kanë zënë sytë,” i ka thënë gazetës franceze ish-kreu i UEFA-s.

“Ai mendonte se do të plakej, se do të vdiste e do të varrosej në FIFA. Kjo ishte dëshira e tij.”

Sepp Blatter u dënua që të qëndrojë larg futbollit për tetë vite, një masë e zbritur më pas në gjashtë vite. Gjykata e Arbitrazhit Sportiv u tregua më zemërgjerë me Platini-në, duke ia zbritur dënimin në katër vite.

“Ai gjithmonë thoshte se unë do të isha trofeu i tij i fundit,” ka pretenduar ish-lojtari i Juventusit dhe i përfaqësueses franceze. /tesheshi.com/