Nga Gjergji Koja
Ridvan Bode dhe Astrit Patozi janë dy nga ish-zyrtarët e lartë të PD-së që kanë mbështetur atë që u quajt si platforma për ringritjen e kësaj partie.
E ndërkohë mes emrave të publikuar si mbështetës të kësaj lëvizjeje brenda PD-së mungojnë të tjerë emra të njohur si Jozefina Topalli, Arben Imami, Eduart Selami apo Genc Ruli.
Megjithëse, të katër këto figura të PD-së ndër vite, kanë shprehur kritika të forta ndaj Lulzim Bashës, ato nuk i janë bashkuar të paktën publikisht kësaj lëvizjeje, apo emrat e tyre nuk renditen mes dhjetra të tjerëve që mbështesin platformën.
Nismëtarët e kësaj lëvizjeje kanë lënë të hapur mundësinë që gjithkush brenda PD mund të bashkohet me lëvizjen për ringritjen e PD-së.
Genc Ruli, ish-ministër në 8 vitet e qeverisjes së PD-së, ka deklaruar tërheqjen nga politika, çka do të thotë se të paktën publikisht ai nuk ka ndërmend t´I bashkohet lëvizjes së inicuar nga Patozi, Bode dhe anëtarë të tjerë të PD-së.
Arben Imami, është ndër të vetmit kritikë të Lulzim Bashës që sot është anëtar i kryesisë së kësaj partie, të paktën deri në zgjedhjet e ardhshme brenda forcës më të madhe të opozitës. Imami e ka shumë të qartë se çfarë do të thotë të inicosh një lëvizje, e cila të paktën publikisht nuk është mbështetur nga ish-kryeministri Sali Berisha, pavarësisht se një pjesë e emrave të përfshirë në të, kanë qenë bashkëpunëtorë ndër vite të tij. Ish-ministri i Mbrojtjes pati një eksperiencë jo fort të mirë më 1992 kur bashkë me ata që u quajtën në atë kohë si grupi i mocionistëve nisën një lëvizje, që më pas u pasua me themelimin e Aleancës Demokratike, për t´u rikthyer sërisht në partinë që kishte themeluar në 1990. Por, si anëtar i kryesisë, Imami i ka të qarta edhe raportet mes grupimeve në PD. Ai ishte prezent edhe në mbledhjen e fundit, ku pati debate, diskutime, incidente, sikundër ia di shumë mirë peshën politike brenda PD-së, emrave që përfshihen në listën e mmbështetësve.
Jozefina Topalli pavarësisht kritikave dhe kundërshtive që ka ndaj Bashës po kështu e ka të qartë se përsa kohë kreu demokrat nuk do të ketë kundër Sali Berishën, çdo lëvizje në PD mund të sfumohet, ose mund të mos marrë forcën e duhur, pavarësisht artikulimeve. Dhe Topalli për shkak edhe të pozicioneve që ka pasur në PD në të paktën 20 vite, e di fare mirë se si reagojnë ata që quhen militantët partiakë kur ka zhvillime të tilla. Ajo ishte nënkryetare e PD-së në 2000, kur kolegu i saj, Genc Pollo, nisi në atë kohë, lëvizjen kundër Berishës, e cila ishte në përmasa shumë më të vogla se kjo e sotmja, por që solli një reagim të ashpër të militantëve demokratë, madje aq të fortë sa ato që ishin në krah të lëvizjes nuk mund të hynin dot as në selinë e PD-së.
Eduart Selami, kandidoi përballë Bashës në një proçes që në rastin më të mirë u quajt jo i ndershëm, ndërsa të tjerë e cilësuan si farsë. Edhe Selami ka një eksperiencë jo fort të mirë në vitin 1995 kur e shkarkuan dhe e përzunë nga PD, thjesht se i doli kundër Berishës. Por gjithashtu, pavarësisht se Selami herë pas here ka shfaqur kritika, sikundër kolegët e tij në PD, nuk ka pasur dhe as ka dhënë mbështetje të ndërsjelltë mes tyre.
Nga ana e tjetër, ish-kryeministri nuk ka shfaqur një qëndrim të qartë dhe të prerë, të paktën publikisht. Ai herë kritikon Bashën dhe herë e lavdëron, herë i jep të drejtë kundërshtarëve të tij në PD dhe herë distancohet prej tyre. Por pavarësisht deklarimeve, Berisha legjitimoi 22 korrikun, datën kur demokratët votuan kryetarin e tyre, ndërsa kritikët e cilësonin farsë proçesin.
Ndoshta kjo është arsyeja pse sot disa nga kritikët dhe kundërshtarët e Bashës në PD hezitojnë të mbështesin hapur një lëvizje, e cila mund të sfumohet pa lindur mirë, nëse nga ish-kryeministri do të ketë një ndërhyrje për të ulur tensionet.
Mjafton të shikosh listën e publikuar, një pjesë e konsiderueshme e tyre njihen si ish-bashkëpunëtorët e afërt dhe mbështetësit më të zjarrtë të Berishës ndër vite. /tesheshi.com/
