Deputetët e VMRO-DPMNE-së, edhe sot kanë vazhduar që në seancën konstituive të Kuvendit të debatojnë me deklaratat e zyrtarëve dhe deputetëve të BDI-së dhe “Aleancës për Shqiptarët” për platformën e Tiranës. Ata thonë se pikërisht këta deputetë kanë demantuar LSDM-në dhe kanë konfirmuar dyshimet e VMRO-së lidhur me ekzistencën e një platforme të shtetit fqinj. Ndryshe deputeti i VMRO-DPMNE-së, Dimitar Stevananxhija akuzoi deputetët e LSDM-së se pikërisht ata po e bllokojnë Kuvendin me fjalime procedurale, duke dashur të dëshmojnë të kundërtën e asaj që thonë partitë shqiptare, se gjoja nuk paska platformë.
“Po të kishit dashur të zgjidhni kryetar Kuvendi ju do të kishit hequr dorë nga ndërhyrjet procedurale dhe debati do të vazhdonte. Por juve ju dhemb se Gëzim Ostreni dhe deputetët e Aleancës për shqiptarët e konfirmuan se ekziston platforma e Tiranës”, tha Stevananxhija.
Nga ana tjetër deputeti i PRSD-së, Goran Misovski që është pjesë e koalicionit të drejtuar nga Zoran Zaev, duke iu përgjigjur akuzave të VMRO-së tha se nuk ekziston ndonjë platformë shqiptare, por platformë kriminale e VMRO-së.
“Kolegë të nderuar nuk ka asnjë platformë. Deputetët e VMRO-së disa ditë mundohen ta mbështesin platformën: “dora e majtë, xhepi i djathtë”. Të nderuar kolegë ka disa ditë që mundoheni t’i mbroni kriminelët”, tha Misovski.
Se nuk ekziston një Platformë e ashtuquajtur e Tiranës, këtë e ka dëshmuar në intervistën e fundit për “Report TV” edhe kryeministri i Shqipërisë, Edi Rama. Ai ka deklaruar se nuk ekziston një Platformë por vetëm se ka “Deklaratë të shqiptarëve nga Maqedonia” me të cilën Tirana zyrtare nuk ka asnjë lidhje.
“Ne kemi pasur takime të ndara me liderët e partive shqiptare dhe kemi marrë shënim gjithçka që është thënë. Ata janë bashkuar në një copë letre”, ka thënë Rama në intervistë në “Report TV”.
Sipas tij, e vërteta është krejtësisht ndryshe nga ajo çfarë thotë Gjorge Ivanov dhe VMRO-DPMNE-ja. Ai ka shtuar se nuk pajtohet të takohet me asnjë nga liderët e partive gjatë kohës që është duke u zhvilluar fushata zgjedhore.
Rama u shpreh i vendosur se shqiptarët në Maqedoni “nuk janë refugjatë, por pjesë integrale e një shteti me dy entitete”.
Mensur Krasniqi- /tesheshi.com/
