Nga Blendi Gashi
Çarjet brenda partive po dalin të jenë një “sëmundje” e pashërueshme dhe në Kosovë, si kudo në shqiptari. Trendin e ndarjes në dy krahë e nisi LDK-ja e pas-Ibrahim Rugovës kur ky i fundit ndërroi jetë. Ishin grushtat e shpërthyer mes zyrtarëve të kësaj partie prej së cilës lindi Lidhja Demkoratike e Dardanisë me në krye me akademik Nexhat Dacin. Vite më vonë, fatin e saj e përcolli edhe PDK-në që kulmoi me largimin e Jakup Krasniqit e Fatmir Limajt, prej të cilëve lindi NISMA për Kosovës.
Ndërsa Vetëvendosje, edhe pse ka patur ca largime individuale shoqëruar me gricje të rëndomta, kurrë nuk kishte shfaqur probleme madhore brenda radhëve, deri kur një ditë më parë ishte një grua, deputetja Aida Dërguti, cila shpërfaqi anën e fshehur të VV-së, ndësitë e mëdha. Ajo iu vërsul më fjalë fyese liderit historic Albin Kurti, për t’u pasuar nga qëndrime zinxhir, gjë që ka treguar se dhe aty ka një klimë të pashëndetshme, ndryshe nga sa dukej.
Dhe shenjat janë që brenda pak javësh VV mund të rrëshqasë drejt ndarjes me pasoja të pariparueshme.
Pse Albini do mbijetonte politikisht e jo “armiqtë” e tij partiak?
Gjithnjë duke ju referuar reagimeve të deputetëve e aktivistëve të VV-së, kuptohet se në këtë parti tashmë është krijuar një “grup paralel” në krye me Daradan Molliqajn e që raportohet se krisja e madhe ka nisur pas largimit të tij nga pozita e Sekretarit të Përgjithshëm, edhe pse ai përmes një postimi në Facebook deklaroi se dorëhiqet për të marrë detyra të reja, pra si deputet.
Përkundër kontributit të madh që kanë dhënë në rritjen e parties, Molliqaj por edhe Dërguti duhet ta kenë të qartë se ata mund ta dëmtojnë në plan afatshkurtër Kurtin dhe partinë ku milituan për vite, por assesi nuk mund të dalin triumfues ndaj tij dhe të kenë sukses në një subjekt të ri.
Se VV identifikohet me Kurtin dhe se pa të kjo lëvizje bie përtokë, e treguan qindra komente të përkrahësve në rrjetet sociale pas plasjes së skandalit ku hapur e “kryqëzuan” Aida duke kërkuar largimin e saj, çka një pjesë e deputetëve e mbrojti duke thënë se “kjo nuk është mënyra si duhet zgjidhur problemet, pasi njeriu gabon”.
Andaj rrugëtimi i kësaj partie mbetet në duar të Kurtit, reagimin e të cilit e presin të gjithë vetëvendosësit.
Pra mbetet të shihet ditëve në vijim nëse Albini do tregoi se kush janë “zemrat” që nuk e duan apo do të vendosë që të vazhdojë jetesën me ta nën një kulm. /tesheshi.com/
