Sekretari amerikan i Shtetit Antony Blinken përshkroi të martën një plan për menaxhimin e pasluftës të Rripit të Gazës, duke njoftuar se administrata në largim e Presidentit Joe Biden do t’ia dorëzonte ato udhëzime Presidentit të sapozgjedhur Donald Trump nëse arrihet një armëpushim.
Duke folur në një takim të Këshillit Atlantik në Uashington, në ditët e tij të fundit si Sekretar i Shtetit i SHBA-së, Blinken tha se Shtëpia e Bardhë dëshiron që Gaza të drejtohet nga një Autoritet Palestinez i reformuar dhe u bëri thirrje partnerëve ndërkombëtarë që të ndihmojnë në krijimin e një qeverie të përkohshme në enklavën palestineze.
Plani i administratës amerikane në largim parashikon krijimin e një force sigurie të përbërë nga anëtarë të vendeve partnere dhe personel palestinez të verifikuar, tha Blinken gjatë fjalimit të tij, i cili u ndërpre disa herë nga protestuesit, duke akuzuar Sekretarin e Shtetit për mbështetjen e gjenocidit të Izraelit kundër palestinezët.
Blinken foli ndërsa negociatorët takohen në Katar me shpresën për të finalizuar një plan për t’i dhënë fund luftës në Gaza, pas 15 muajsh konflikti që e ka shndërruar enklavën në gërmadhë dhe ka sjellë paqëndrueshmëri në Lindjen e Mesme më të gjerë. Kryedilomati amerikan tha se marrëveshja ishte “më afër se kurrë”.
“Ne kemi punuar intensivisht me partnerët tanë për muaj të tërë për të zhvilluar një plan të detajuar të pasluftës që do të lejojë Izraelin të tërhiqet plotësisht nga Gaza, të parandalojë Hamasin të kthehet atje dhe të mundësojë qeverisjen, sigurinë dhe rindërtimin në Gaza”, tha Blinken.
Trump dhe ekipi i tij i ardhshëm nuk kanë thënë nëse do ta zbatojnë apo jo këtë plan, raporton Reuters.
Blinken beson se ky propozim është një “horizont politik i besueshëm për palestinezët”, i nevojshëm për të parandaluar rishfaqjen e Hamasit.
Shtetet e Bashkuara kanë paralajmëruar vazhdimisht Izraelin se grupi militant palestinez nuk mund të mposhtet vetëm me mjete ushtarake, tha Blinken.
“Ne vlerësojmë se Hamasi ka rekrutuar pothuajse aq luftëtarë të rinj sa ka humbur. Kjo është një recetë për një kryengritje të përhershme dhe luftë të pafund.”
Blinken e ndërpreu fjalimin e tij tre herë për shkak të protestuesve. Ata bërtisnin se qeveria Biden ishte bashkëpunëtore në krimet e luftës të kryera nga Izraeli në Rrip.
US Secretary of State Anthony Blinken has been branded as a "monster" by a pro-Palestinian protester who interrupted his speech at the Atlantic Council in Washington.
Read more: https://t.co/w4s8Rywes8 pic.twitter.com/03sRhDtM9z
— Sky News (@SkyNews) January 14, 2025
“Ti do të njihesh përgjithmonë si Blinken gjakatar, Sekretar i Gjenocidit,” bërtiti një protestues. /tesheshi.com/
